പാലക്കാട്: സ്വര്‍ണക്കടത്ത് കേസിലെ പ്രതി സരിത്തിനെ പാലക്കാട്ടെ ഫ്‌ളാറ്റിലെത്തി കൊണ്ടുപോയത് വിജിലന്‍സ് സംഘമെന്ന് സ്ഥിരീകരണം. പാലക്കാട്ടെ വിജിലന്‍സ് യൂണിറ്റാണ് സരിത്തിനെ കസ്റ്റഡിയില്‍ എടുത്തിരിക്കുന്നത്.
ലൈഫ് മിഷന്‍ കേസില്‍ സ്വപ്നയ്‌ക്കൊപ്പം സരിത്തും പ്രതിയാണ്. ഈ കേസുമായി ബന്ധപ്പെട്ടാണ് കസ്റ്റഡിയില്‍ എടുത്തിരിക്കുന്നതെന്നാണ് സൂചന. ഇതുമായി ബന്ധപ്പെട്ട് കൂടുതല്‍ വിവരങ്ങള്‍ നല്‍കാന്‍ പോലീസ് തയാറായിട്ടില്ല.
താന്‍ ജോലി ചെയ്യുന്ന കമ്പനിയിലെ സ്റ്റാഫായിരുന്ന സരിത്തിനെ തട്ടിക്കൊണ്ടുപോയെന്ന് സ്വപ്ന നേരത്തേ ആരോപിച്ചിരുന്നു. എച്ച് ആര്‍ടിഎസിന്റെ സ്റ്റാഫായിരുന്ന സരിത്തിനെ പോലീസ് ആണെന്ന വ്യാജേന താമസസ്ഥലത്തെത്തിയാണ് തട്ടിക്കൊണ്ടുപോയത്.
പാലക്കാടുള്ള ഫ്‌ലാറ്റില്‍നിന്നാണ് ഇയാളെ തട്ടിക്കൊണ്ടുപോയതെന്നാണ് ആരോപണം. വന്നവര്‍ക്ക് ഐഡി കാര്‍ഡോ, യൂണിഫോമോ ഉണ്ടായിരുന്നില്ല. രാവിലെ താന്‍ മാധ്യമങ്ങളെ കണ്ടതിനു തൊട്ടുപിന്നാലെയാണ് സംഭവമെന്നും സ്വപ്ന പറഞ്ഞു.
തന്റെ വെളിപ്പെടുത്തലുകള്‍ പലരെയും ഭയപ്പെടുത്തുന്നുണ്ടെന്നതിന്റെ തെളിവാണിത്. തനിക്കും കുടുംബത്തിനും ഭീഷണിയുണ്ടെന്നും അവര്‍ പറഞ്ഞു.
Discussion about this post