തിരുവനന്തപുരം: പെറ്റിക്കേസുകളുടെ പേരില്‍ പൊലീസ് ക്ലിയറന്‍സ് സര്‍ട്ടിഫിക്കറ്റ് നിഷേധിക്കരുതെന്ന് ഡിജിപി. പൊലീസ് ക്ലിയറന്‍സ് സര്‍ട്ടിഫിക്കറ്റ് നല്‍കുന്നതില്‍ വ്യക്തത വരുത്തി ഡിജിപി പുതിയ ഉത്തരവിറക്കി. ഡിജിപിയുടെ പുതിയ തീരുമാനം നിരവധി അപേക്ഷകര്‍ക്ക് ഗുണകരമാകും. പഠനാവശ്യത്തിനും ജോലിക്കും ക്ലിയറന്‍സ് സര്‍ട്ടിഫിക്കറ്റ് നല്‍കേണ്ടത് പൊലീസാണ്. സ്ഥിര താമസക്കാരും ദീര്‍ഘനാളായി സംസ്ഥാനത്ത് തങ്ങുന്നവരും അതാത് പൊലീസ് സ്റ്റേഷനുകളില്‍ നിന്നാണ് സര്‍ട്ടിഫിക്കറ്റ് വാങ്ങേണ്ടത്. കേസുകളില്‍ ഉള്‍പ്പെട്ടവര്‍ക്ക് പൊലീസ് ക്ലിയറന്‍സ് നല്‍കാറില്ല. പെറ്റി കേസുകളില്‍ പെട്ടവര്‍ക്കും ഗതാഗത നിയമങ്ങള്‍ ലംഘിച്ച കേസില്‍ പിഴ അടച്ചവര്‍ക്ക് പോലും നിലവില്‍ ക്ലിയറന്‍സ് സര്‍ട്ടിഫിക്കറ്റ് നിഷേധിക്കുന്ന സ്ഥിതിയാണ് നിലവിലുള്ളത്.
തൊഴില്‍ അവസരങ്ങള്‍ നഷ്ടമാകുന്നത് അടക്കമുള്ള പ്രശ്‌നങ്ങള്‍ ജനപ്രതിനിധികള്‍ ശ്രദ്ധയില്‍പ്പെടുത്തിയതോടെയാണ് ഡിജിപിയുടെ ഇടപെടല്‍. പുതിയ ഉത്തരവിറക്കിയതോടെ പല സ്റ്റേഷനുകളില്‍ തടഞ്ഞുവച്ചിരിക്കുന്ന നൂറുകണക്കിന് അപേക്ഷകളില്‍ പൊലീസിന് തീരുമാനമെടുക്കാന്‍ കഴിയും. വിദേശത്ത് ജോലിക്ക് പോകുന്നവര്‍ക്കുള്ള ക്ലിയറന്‍സ് സര്‍ട്ടിഫിക്കറ്റും പൊലീസ് സ്റ്റേഷനുകളില്‍ നിന്നാണ് നല്‍കിയിരുന്നത്. എന്നാല്‍ ഹൈക്കോടതി നിര്‍ദ്ദേശപ്രകാരം അത് പാസ്‌പോര്‍ട്ട് ഓഫീസില്‍ നിന്നാക്കി.
അതേസമയം തന്നെ നിരവധി തവണ ബോധപൂര്‍വ്വം ഗതാഗതനിയമ ലംഘനം നടത്തിയവരുണ്ടെങ്കില്‍ അത്തരം കേസുകള്‍ പ്രത്യേകം തന്നെ പരിശോധിക്കും. മത്സരയോട്ടം, അലക്ഷ്യമായ വാഹമോടിച്ച് അപകടം വരുത്തല്‍ തുടങ്ങിയ കുറ്റകൃത്യങ്ങള്‍ ആവര്‍ത്തിച്ചു ചെയ്തവര്‍ക്ക് ക്ലിയറന്‍സ് സര്‍ട്ടിഫിക്കറ്റ് നല്‍കുന്ന കാര്യം സ്റ്റേഷന്‍ ഹൗസ് ഓഫീസര്‍മാര്‍ പ്രത്യേകം പരിശോധിച്ചുമാത്രമേ തീരുമാനമെടുക്കൂ.
