ശ്രീനഗര്: അമര്നാഥ് തീര്ത്ഥാടനത്തിന് തുടക്കമായി. തീര്ത്ഥാടകരുടെ ആദ്യസംഘത്തിന്റെ ഫ്ലാഗ് ഓഫ് ഡെപ്യൂട്ടീ കമ്മീഷണര് പിയൂഷ് സിംഗ്ല നിര്വ്വഹിച്ചു. അനന്തനാഗിലെ പഹല്ഗാം ജില്ലയിലെ നുന്വാന് ബേസ് ക്യാപില്നിന്നുമാണ് തീര്ത്ഥാടകര് പുറപ്പെട്ടത്.
കനത്ത സുരക്ഷയുടെ തണലില് 2750 തീര്ത്ഥാടകരെയാണ് അധികൃതര് ആദ്യ ഘട്ട സംഘമായി നിശ്ചയിച്ചത്. സിആര്പിഎഫ്, ഇന്തോ ടിബറ്റന് ബോര്ഡര് ജവാന്മാരുടെ അകമ്പടിയോടെയാണ് തീര്ത്ഥാടകര് തെക്കന് കശ്മീരിലെ ഹിമാലയന് മലനിരകള് താണ്ടാനൊരുങ്ങുന്നത്. ഇന്നലെ 4890 പേരടങ്ങുന്ന സംഘത്തെ ജമ്മു ബേസ് ക്യാമ്പില് നിന്നും ലഫ്.ഗവര്ണര് മനോജ് സിന്ഹ ഫ്ലാഗ് ഓഫ് ചെയ്തിരുന്നു.
മൂന്ന് ദിവസം കൊണ്ട് അമര്നാഥിലെ ഗുഹാക്ഷേത്രത്തിലെത്താന് കഴിയും. ഈ സീസണില് മാത്രം മഞ്ഞില് സ്വയം രൂപമെടുക്കുന്ന ശിവലിംഗമാണ് അമര്നാഥിലേത്. ഗുഹാക്ഷേത്രത്തിലെ ശിവലിംഗ ദര്ശനത്തിന്റെ അപൂര്വ്വ കാഴ്ചയ്ക്കായാണ് നിരവധി കടമ്പകള് താണ്ടി ചെറുപ്പക്കാരും വൃദ്ധരുമെല്ലാം യാത്രയ്ക്കായി അപേക്ഷിക്കുന്നത്. ഭീകരാക്രമണ ഭീഷണിയുള്ളതിനാല് 43 ദിവസത്തെ തീര്ത്ഥാടന കാലം ശക്തമായ സുരക്ഷയിലാണ് നടത്തുന്നത്.
Discussion about this post