മംഗളൂരു: സുള്ള്യയിലെ യുവമോര്ച്ച നേതാവ് പ്രവീണ് നെട്ടാരെയുടെ കൊലപാതകത്തില് ആറുപേര്കൂടി കസ്റ്റഡിയില്. പോപ്പുലര് ഫ്രണ്ട്, എസ് ഡി പി ഐ പ്രവര്ത്തകരാണ് പിടിയിലായത്. ഇതോടെ കേസുമായി ബന്ധപ്പെട്ട് കസ്റ്റഡിയിലെടുത്തവരുടെ എണ്ണം ഇരുപത്തൊന്നായി.
അതേസമയം കേസിന്റെ അന്വേഷണം കേരളത്തിലേക്ക നീളുകയാണ്. കേരളാ ബന്ധമുള്ളവരാണ് കേസിലെ പ്രതികളെന്നാണ് പൊലീസ് നല്കുന്ന സൂചന. പ്രതികളെക്കുറിച്ച് വ്യക്തമായ സൂചന ലഭിച്ചിട്ടുണ്ടെന്ന് മംഗളൂരു എസ് പി അറിയിച്ചു. കൊലപാതക സംഘം കേരള രജിസ്ട്രേഷനുള്ള ബൈക്കിലാണ് എത്തിയതെന്ന് ദൃക്സാക്ഷികള് പൊലീസിന് മൊഴി നല്കിയിരുന്നു. ഈ വാഹനം ഇന്നലെ അന്വേഷണ സംഘം കസ്റ്റഡിയിലെടുത്തിരുന്നു. അന്വേഷണത്തിനായി കര്ണാടക പൊലീസിന്റെ പ്രത്യേക സംഘം കേരളത്തിലെത്തും. കര്ണാടക പൊലീസ് മേധാവി കേരള ഡിജിപിയുടെ സഹായം തേടിയിട്ടുണ്ട്.
ബെല്ലാരയില് പൗള്ട്രി ഫാം നടത്തിപ്പുകാരനായ പ്രവീണ് (32) ചൊവ്വാഴ്ച രാത്രി ഒമ്പതോടെ വീട്ടിലേക്ക് പോകാനിറങ്ങുമ്പോള് ബൈക്കിലെത്തിയ രണ്ടംഗസംഘം വെട്ടിക്കൊല്ലുകയായിരുന്നു. ഈ മാസം 21ന് സുളള്യ പുത്തൂര് സ്വദേശി മുഹമ്മദ് മസ്ഊദിനെ എട്ടംഗ സംഘം കൊലപ്പെടുത്തിയിരുന്നു. ഇതിന് പ്രതികാരമാണ് യുവമോര്ച്ച നേതാവിന്റെ കൊലപാതകമെന്നാണ് പൊലീസ് കരുതുന്നത്. എന്നാല്, രാജസ്ഥാനിലെ കനയ്യ ലാലിനെ പിന്തുണച്ചതിന്റെ പേരിലാണ് പ്രവീണ് നെട്ടാരെയുടെ കൊതപാകമെന്നാണ് ബി ജെ പി ആരോപണം. കനയ്യ ലാലിനെ പിന്തുണച്ച് പ്രവീണ് നെട്ടാര് സമൂഹമാദ്ധ്യമങ്ങളില് രംഗത്തെത്തിയിരുന്നു. ഇതിലുള്ള പ്രതികാരമായാണ് കൊലപാതകമെന്നാണ് ബി ജെ പി ആവര്ത്തിക്കുന്നത്. കനയ്യ ലാലിനെ കൊലപ്പെടുത്തിയ പോലെ കഴുത്ത് മുറിച്ചും മറ്റുമാണ് പ്രവീണ് നെട്ടാരെയേയും കൊലപ്പെടുത്തിയിരിക്കുന്നത്. ഇതിന് പിന്നില് പോപ്പുലര് ഫ്രണ്ട്,എസ് ഡി പി ഐ പ്രവര്ത്തകര് ആണെന്നും ബിജെപി ആരോപിക്കുന്നു.
അതിനിടെ, കൊലപാതകകേസില് അന്വേഷണം ഊര്ജിതമല്ലെന്ന് പാര്ട്ടിക്കുള്ളില് ആക്ഷേപം ശക്തമാണ്. പ്രതികളെ എത്രയും പെട്ടെന്ന് അറസ്റ്റുചെയ്തില്ലെങ്കില് രാജിവയ്ക്കുമെന്ന് യുവമേര്ച്ചയിലെ ചില നേതാക്കള് പാര്ട്ടി കേന്ദ്രങ്ങള്ക്ക് മുന്നറിയിപ്പ് നല്കിയിട്ടുണ്ട്. കൊപ്പാല് ജില്ലയിലെ പ്രവര്ത്തകര് ബിജെപി ദേശീയ നേതൃത്വത്തിന് കൂട്ടരാജി കത്ത് നല്കിയെന്നും റിപ്പോര്ട്ടുണ്ട്.
Discussion about this post