ലണ്ടന്: ബ്രിട്ടന്റെ പുതിയ പ്രധാനമന്ത്രിയായി ഇന്ത്യന് വംശജന് ഋഷി സുനാക് അധികാരമേറ്റു. ചാള്സ് മൂന്നാമന് രാജാവ് പുതിയ ഭരണാധികാരിയായി നിയമന ഉത്തരവ് പുറത്തിറക്കിയതോടെ ഈ വര്ഷം രാജ്യത്തിന്റെ തലപ്പത്ത് എത്തുന്ന മൂന്നാമത്തെ വ്യക്തിയായി സുനാക് മാറി.
അധികാരമേറ്റ ശേഷം പ്രധാനമന്ത്രിയുടെ ഔദ്യോഗിക വസതിയായ 10 ഡൗണിംഗ് സ്ട്രീറ്റിന് മുന്പില് ജനങ്ങളെ അഭിസംബോധന ചെയ്യവേ രാജ്യം കടുത്ത സാന്പത്തിക പ്രതിസന്ധിയെ നേരിടുകയാണെന്നും കോവിഡ് സൃഷ്ടിച്ച പ്രകന്പനങ്ങള് ഇപ്പോഴും തുടരുകയാണെന്നും സുനാക് പ്രസ്താവിച്ചു.
മുന്ഗാമിയായ ലിസ് ട്രസിന്റെ പരിഷ്കാരങ്ങളുടെ ഉദ്ദേശശുദ്ധിയെ പുകഴ്ത്തിയ സുനാക്, നിനച്ചിരിക്കാതെ തെറ്റുകള് സംഭവിച്ചെന്നും ഇത് പരിഹരിക്കാന് നടപടികളെടുക്കുമെന്നും പറഞ്ഞു. മുന്ഗാമിയുടെ തെറ്റുകള് തിരുത്താനാണ് കണ്സര്വേറ്റീവ് പാര്ട്ടിയുടെ നായകനും പ്രധാനമന്ത്രിയുമായി തന്നെ തെരഞ്ഞെടുത്തതെന്നും ഇതിനായുള്ള ജോലികള് ഉടന് ആരംഭിക്കുമെന്നും അദേഹം കൂട്ടിച്ചേര്ത്തു.
‘ചാന്സലറായിരിക്കെ ജനങ്ങളെയും വ്യവസായങ്ങളെയും സംരക്ഷിക്കാന് ചെയ്തത് ഇനിയും തുടരും; ഭാവി തലമുറ കടക്കെണിയില് അകപ്പെടാന് അനുവദിക്കില്ല. വാക്കുകള് കൊണ്ടല്ലാതെ പ്രവര്ത്തി കൊണ്ട് രാജ്യത്തെ ഒന്നിപ്പിക്കുകയും ജനങ്ങള്ക്കായി രാപ്പകല് അധ്വാനിക്കുകയും ചെയ്യും. എന്റെ മന്ത്രിസഭ സത്യസന്ധതയും പ്രഫഷണലിസവും നേടിയെടുക്കും; വിശ്വാസത ജനങ്ങള് ഞങ്ങള്ക്ക് സമ്മാനിക്കും. ബ്രെക്സിറ്റ് അടക്കമുള്ള കാര്യങ്ങളിലെ പാര്ട്ടി നയം ശക്തമായി നടപ്പിലാക്കും. ഞാന് തളരില്ല, ഉയര്ന്ന പദവിയില് പ്രതീക്ഷയ്ക്കൊത്ത പ്രകടനം കാഴ്ചവയ്ക്കും.’ – സുനാക് വ്യക്തമാക്കി.
Discussion about this post