ന്യൂഡല്ഹി: ഡോ. സി.വി. ആനന്ദബോസിനെ പശ്ചിമ ബംഗാള് ഗവര്ണറായി നിയമിച്ചു. മേഘാലയ സര്ക്കാരിന്റെ ഉപദേശകനായിരുന്ന ആനന്ദ ബോസ് സിവില് സര്വന്റ്, എഴുത്തുകാരന്, പ്രഭാഷകന് എന്നീ നിലകളില് പ്രശസ്തനാണ്. റിട്ട. ഐഎഎസ് ഉദ്യോഗസ്ഥനും യുഎന് പാര്പ്പിട വിദഗ്ധ സമിതി ചെയര്മാനുമായിരുന്ന അദ്ദേഹം ചീഫ് സെക്രട്ടറി റാങ്കില് വിരമിച്ച കോട്ടയം മാന്നാനം സ്വദേശിയാണ്. കേന്ദ്ര സെക്രട്ടറി, യൂണിവേഴ്സിറ്റി വൈസ് ചാന്സലര് തുടങ്ങിയ പദവികളും അദ്ദേഹം നിര്വഹിച്ചിട്ടുണ്ട്.
ബംഗാള് ഗവര്ണറായിരുന്ന ജഗ്ദീപ് ധന്കര് ഉപരാഷ്ട്രപതിയായ ഒഴിവിലാണ് ആനന്ദബോസിന്റെ നിയമനം. മണിപ്പൂര് ഗവര്ണര് എല്. ഗണേശനാണ് നിലവില് ബംഗാള് ഗവര്ണറുടെ ചുമതല.
വിദ്യാഭ്യാസം, വനം, പരിസ്ഥിതി, തൊഴില്, പൊതുഭരണം തുടങ്ങി വിവിധ മന്ത്രാലയങ്ങളില് സെക്രട്ടറി, പ്രിന്സിപ്പല് സെക്രട്ടറി, അഡീഷണല് ചീഫ് സെക്രട്ടറി എന്നീ നിലകളില് പ്രവര്ത്തിച്ചിട്ടുണ്ട്. കൊല്ലം ജില്ലാ കളക്ടറായിക്കെ ജനങ്ങള്ക്ക് ചെലവ് കുറഞ്ഞതും പരിസ്ഥിതി സൗഹൃദപരവുമായ വീടുകള് നല്കുന്നതിനായി ബോസ് സ്ഥാപിച്ച നിര്മിതി കേന്ദ്രം ദേശീയ ശൃംഖലയായി മാറുകയും ദേശീയ ഭവന നയത്തിന്റെ ഭാഗമാവുകയും ചെയ്തു.
ഭരണഘടനാപരമായ പദവി ലഭിച്ചതില് സി. വി. ആനന്ദബോസ് പ്രധാനമന്ത്രി നരേന്ദ്ര മോദിക്കു നന്ദി പറഞ്ഞു. ഭരണഘടനയനുസരിച്ച് ഭരണപക്ഷവും പ്രതിപക്ഷവുമായി യോജിച്ചു പ്രവര്ത്തിക്കുമെന്നും സുഗമവും സുതാര്യവുമായ ഭരണമാണ് ലക്ഷ്യം വയ്ക്കുന്നതെന്നും അദ്ദേഹം കൂട്ടിച്ചേര്ത്തു.
Discussion about this post