ചെന്നൈ: ഗായിക വാണി ജയറാമിന്റെ മരണത്തിലേക്ക് നയിച്ചത് തലയിലേറ്റ മുറിവെന്ന് പൊലീസ്. കിടക്കയില് നിന്ന് എഴുന്നേല്ക്കുമ്പോള് വീണ് മേശയില് തലയിടിക്കുകയായിരുന്നുവെന്നും ഇതാണ് മരണത്തിന് കാരണമായതെന്നുമാണ് പൊലീസ് വിശദീകരിക്കുന്നത്. മരണത്തില് മറ്റ് സംശയങ്ങള് ഒന്നുമില്ലെന്നും പൊലീസ് വ്യക്തമാക്കി.
ചെന്നൈ നുങ്കമ്പാക്കത്തെ ഹാഡോസ് റോഡില് ഉള്ള വസതിയിലാണ് വാണിയെ മരിച്ച നിലയില് കണ്ടെത്തിയത്. 2018-ല് ഭര്ത്താവ് ജയറാം അന്തരിച്ച ശേഷം വാണി ഒറ്റയ്ക്കായിരുന്നു ഈ വീട്ടില് താമസം. രാവിലെ 11 മണിയോടെ സഹായിയായ സ്ത്രീ വീട്ടിലെത്തിയെങ്കിലും വാണി വാതില് തുറന്നില്ല. ഇതോടെ ഇവര് ബന്ധുക്കളേയും പൊലീസിനേയും വിവരം അറിയിച്ചു. പിന്നീട് പൊലീസ് ഉദ്യോഗസ്ഥര് സ്ഥലത്ത് എത്തി വാതില് പൊളിച്ച് അകത്ത് പ്രവേശിക്കുകയായിരുന്നു. കിടപ്പുമുറിയില് മരണപ്പെട്ട നിലയിലാണ് വാണിയെ കണ്ടെത്തിയത്.
വാണി ജയറാമിന്റെ സംസ്കാരം ഇന്ന് നടക്കും. ഉച്ചയ്ക്ക് രണ്ടുമണിക്ക് ചെന്നൈ ബസന്ത് നഗര് വൈദ്യുതി ശ്മശാനത്തിലാണ് സംസ്കാരം നിശ്ചയിച്ചിരിക്കുന്നത്. പൂര്ണ ഔദ്യോഗിക ബഹുമതികളോടെയാകും സംസ്കാരം. പോസ്റ്റ്മോര്ട്ടത്തിന് ശേഷം ഇന്നലെ രാത്രി ഫ്ലാറ്റില് തിരികെയെത്തിച്ച ഭൗതികശരീരത്തില് തമിഴ്നാട് ഗവര്ണര് ആര്.എന്.രവി അടക്കം പ്രമുഖര് അന്ത്യാഞ്ജലി അര്പ്പിച്ചു. ഇന്നും പൊതുദര്ശനം തുടരും.
