ന്യൂഡല്ഹി: ശിവസേന എന്ന പേരും ‘അമ്പും വില്ലും’ ചിഹ്നവും മഹാരാഷ്ട്ര മുഖ്യമന്ത്രി ഏക്നാഥ് ഷിന്ഡെ നയിക്കുന്ന വിഭാഗത്തിന് അനുവദിച്ച തെരഞ്ഞെടുപ്പ് കമ്മീഷന്റെ നടപടി റദ്ദാക്കണമെന്ന ഉദ്ധവ് താക്കറെ വിഭാഗത്തിന്റെ ആവശ്യം സുപ്രീം കോടതി തള്ളി.
പാര്ട്ടി പേരും ചിഹ്നവും സംബന്ധിച്ച ഉത്തരവിന്മേല് നിലവില് മാറ്റങ്ങള് വരുത്താനാകില്ലെന്നും തല്സ്ഥിതി തുടരണമെന്നും കോടതി അറിയിച്ചു. എന്നാല് വിഷയത്തിന്മേല് താക്കറെ വിഭാഗം നല്കിയ ഹര്ജി പരിഗണിക്കുമെന്ന് കോടതി വ്യക്തമാക്കി. ഹര്ജി രണ്ടാഴ്ച്ചയ്ക്ക് ശേഷം കോടതി പരിഗണിക്കും.
പാര്ട്ടിയുടെ സ്വത്തുക്കളും ബാങ്ക് അക്കൗണ്ടുകളും ഷിന്ഡെ വിഭാഗം സ്വന്തമാക്കാതിരിക്കാന് നടപടി വേണമെന്ന താക്കറെ വിഭാഗത്തിന്റെ ആവശ്യം കോടതി തള്ളി. സ്വത്തുവകകള് മരവിപ്പിക്കാന് സാധിക്കില്ലെന്ന് കോടതി അറിയിച്ചു. ഇതിനിടെ സ്വത്തുക്കളും പാര്ട്ടി ഓഫീസും ഏറ്റെടുക്കില്ലെന്നും വിപ്പ് പുറപ്പെടുവിക്കുന്ന നടപടികള് നിലവില് നടത്തില്ലെന്നും ഷിന്ഡെ വിഭാഗം കോടതിക്ക് ഉറപ്പ് നല്കി.
കൂറുമാറി ഷിന്ഡെയ്ക്കൊപ്പം ചേര്ന്ന എംഎല്എമാരെ അയോഗ്യരാക്കണമെന്ന താക്കറെ വിഭാഗത്തിന്റെ ആവശ്യവും കോടതി തള്ളി.
Discussion about this post