തിരുവനന്തപുരം : കൊട്ടാരക്കരയില് യുവഡോക്ടര് വന്ദന ദാസ് കൊല്ലപ്പെട്ട സാഹചര്യത്തില് ആരോഗ്യ പ്രവര്ത്തകരുടെ സുരക്ഷ ഉറപ്പാക്കുന്നതിനായി ആശുപത്രി സംരക്ഷണ നിയമത്തില് ആവശ്യമായ ഭേഗദതി വരുത്താന് സര്ക്കാര് തീരുമാനിച്ചു. ഇതുമായി ബന്ധപ്പെട്ടുള്ള നിയമ ഭേദഗതി സംബന്ധിച്ച ഓര്ഡിനന്സ് അടുത്ത മന്ത്രിസഭാ യോഗത്തില് കൊണ്ടുവരും.
കൂടാതെ, പ്രധാന സര്ക്കാര് ആശുപത്രികളില് പോലീസ് ഔട്ട്പോസ്റ്റുകളും സ്ഥാപിക്കും. മുഖ്യമന്ത്രി പിണറായി വിജയന്റെ നേതൃത്വത്തില് ഇന്നലെ ചേര്ന്ന ഉന്നതതല യോഗത്തിലാണു തീരുമാനം.
2012 ലെ കേരള ആരോഗ്യരക്ഷാ സേവന പ്രവര്ത്തകരും ആരോഗ്യരക്ഷാ സേവന സ്ഥാപനങ്ങളും (അക്രമവും സ്വത്തിനുള്ള നാശവും തടയല്) നിയമം കര്ശനമായി നടപ്പാക്കുന്നതു മുന്നിര്ത്തിയാണ് ആവശ്യമായ ഭേദഗതി വരുത്തുക.
നിലവിലുള്ള നിയമത്തില് ആരോഗ്യ സ്ഥാപനങ്ങള്, ആരോഗ്യ പ്രവര്ത്തകര് എന്നീ നിര്വചനങ്ങളില് വരുത്തേണ്ട മാറ്റങ്ങള്, ശിക്ഷകള് തുടങ്ങിയവയില് കാലാനുസൃതമായ ഭേദഗതി കൊണ്ടുവരും.
ചീഫ് സെക്രട്ടറിയുടെ മേല്നോട്ടത്തില് ആഭ്യന്തര വകുപ്പ് അഡീഷണല് ചീഫ് സെക്രട്ടറി, ആരോഗ്യ വകുപ്പ് പ്രിന്സിപ്പല് സെക്രട്ടറി, നിയമ സെക്രട്ടറി എന്നിവര് ഇതു സംബന്ധിച്ച ചര്ച്ചകള് നടത്തി ഭേദഗതി നിര്ദേശങ്ങള് സര്ക്കാരിനു സമര്പ്പിക്കണം.
കേരള ആരോഗ്യ സര്വകലാശാല, ആരോഗ്യപ്രവര്ത്തകരുടെ സംഘടനകള് തുടങ്ങിയവരുമായും ചര്ച്ചകള് നടത്തും. ഡോക്ടര്മാരുടെ സംഘടനകളുടെ നിര്ദേശങ്ങളും ഇക്കാര്യത്തില് സര്ക്കാര് പരിഗണിക്കും.
ആശുപത്രികളെ മൂന്നു വിഭാഗങ്ങളായി തിരിച്ച് സുരക്ഷാ സംവിധാനങ്ങള് ശക്തിപ്പെടുത്താനും ഇന്നലെ ചേര്ന്ന യോഗത്തില് തീരുമാനിച്ചു. ആദ്യവിഭാഗത്തില് വരുന്ന മെഡിക്കല് കോളജുകള്, ജില്ലാ ആശുപത്രികള്, ജനറല് ആശുപത്രികള്, സ്ത്രീകളുടെയും കുട്ടികളുടെയും ആശുപത്രികള് എന്നിവിടങ്ങളില് പോലീസ് ഔട്ട്പോസ്റ്റുകള് സ്ഥാപിക്കും.
എസ്ഐ, എഎസ്ഐ, സിപിഒ ഉദ്യോഗസ്ഥരെ ഡെപ്യൂട്ടേഷനില് ഇവിടെ ചുമതലപ്പെടുത്തും. എല്ലാ ആശുപത്രികളിലും ആവശ്യമായ ക്ലോസ്ഡ് സര്ക്യൂട്ട് കാമറകള് സ്ഥാപിക്കും. ആശുപത്രികളില് ഓരോ ആറു മാസത്തിലും സെക്യൂരിറ്റി ഓഡിറ്റ് നടത്തും. ജില്ലാ കളക്ടറുടെ മേല്നോട്ടത്തിലായിരിക്കും ഓഡിറ്റ്. പ്രതികളെയും അക്രമ സ്വഭാവമുള്ള ആളുകളെയും ആശുപത്രിയില് കൊണ്ടുപോകുന്പോള് പ്രത്യേക സുരക്ഷാ സംവിധാനം ഏര്പ്പെടുത്താനും യോഗത്തില് തീരുമാനമായി.
Discussion about this post