തിരുവനന്തപുരം: വിദ്യാര്ഥികളുടെ ഹാജര് നില, പഠനപുരോഗതി, പ്രോഗ്രസ് റിപ്പോര്ട്ട് തുടങ്ങിയവ രേഖപ്പെടുത്താനും രക്ഷിതാക്കളും സ്കൂളും തമ്മിലുള്ള ബന്ധം സുഗമമാക്കാനും കൈറ്റിന്റെ സമ്പൂര്ണ പ്ലസ് മൊബൈല് ആപ്പ് പുറത്തിറക്കി. പൊതുവിദ്യാഭ്യാസ വകുപ്പ് കുട്ടികളെ സംബന്ധിക്കുന്ന വിവരം സംസ്ഥാന സര്ക്കാരിന്റെ സ്റ്റേറ്റ് ഡാറ്റ സെന്ററില് നിലനിര്ത്തി ഡാറ്റയുടെ സ്വകാര്യതയും സുരക്ഷിതത്വവും ഉറപ്പുവരുത്തിക്കൊണ്ടാണ് മൊബൈല് ആപ്പ് വികസിപ്പിച്ചിട്ടുള്ളത്.
അധ്യാപകര്ക്കും രക്ഷകര്ത്താക്കള്ക്കും പ്രത്യേകം ലോഗിന് സൗകര്യവും സമ്പൂര്ണ പ്ലസില് ഉണ്ട്. നിലവില് കുട്ടികളുടെ ഫോട്ടോ സ്കാന് ചെയ്തോ അല്ലാതെയോ ആണ് സമ്പൂര്ണയില് അപ്ലോഡ് ചെയ്യുക. എന്നാല് അധ്യാപകന് സമ്പൂര്ണ പ്ലസ് ആപ്പ് ഉപയോഗിച്ച് കുട്ടിയുടെ ചിത്രമെടുത്ത് നേരിട്ട് എളുപ്പത്തില് പോര്ട്ടലില് അപ്ലോഡ് ചെയ്യാനാകും. സമഗ്ര വിഭവ പോര്ട്ടലിലെ പഠനസഹായികള് എളുപ്പത്തില് സമ്പൂര്ണ പ്ലസ് ആപ്പ് വഴി കുട്ടികള്ക്ക് തുടര്ന്ന് ലഭിക്കും മൊബൈലിലും കമ്പ്യൂട്ടറുകളിലും സമ്പൂര്ണ പ്ലസിലെ സേവനങ്ങള് ലഭ്യമാകും.
സമ്പൂര്ണ പ്ലസ് മൊബൈല് ആപ്പ് പൊതുവിദ്യാഭ്യാസ വകുപ്പ് മന്ത്രി വി.ശിവന്കുട്ടി തിരുവനന്തപുരത്ത് ഉദ്ഘാടനം ചെയ്തു. സ്കൂള് കുട്ടികള്ക്കായി പ്രത്യേകം സൈബര് സേഫ്റ്റി പ്രോട്ടോകോള് തയാറാക്കി പ്രസിദ്ധീകരിച്ച സംസ്ഥാനമാണ് കേരളമെന്നും ഇവ കൃത്യമായി പാലിക്കുന്നതിനും കുട്ടികളുടെ സ്വകാര്യ വിവരങ്ങള് പങ്കുവയ്ക്കാതിരിക്കുന്നതിനും പ്രത്യേകം ശ്രദ്ധിക്കണം എന്നും വിദ്യാഭ്യാസ മന്ത്രി പറഞ്ഞു. സമ്പൂര്ണ പ്ലസ് കുട്ടികളെ സംബന്ധിക്കുന്ന റിപ്പോര്ട്ടുകള്, ടിസി സ്കോളര്ഷിപ്പുകള്ക്കാവശ്യമായ ലിസ്റ്റുകള്, സ്കൂള് കലോത്സവം, ശാസ്ത്രോത്സവം, കായികോത്സവം തുടങ്ങിയ മത്സരങ്ങള്ക്കാവശ്യമായ പ്രവേശന ഫോറങ്ങള് തയ്യാറാക്കല് കുട്ടികളുടെ ആധാര് പരിശോധന തുടങ്ങിയ സേവനങ്ങളാണ് നിലവില് സമ്പൂര്ണയില് ലഭ്യമായിട്ടുള്ളത്. ഇതിന് പുറമെയാണ് സമ്പൂര്ണ പ്ലസ് വികസിപ്പിച്ചത് ഇതിലൂടെ രക്ഷിതാക്കളും സ്കൂളും തമ്മിലുള്ള വിനിമയം സുഗമമാക്കുന്നുവെന്നും മന്ത്രി വി ശിവന്കുട്ടി പറഞ്ഞു.
പ്ലേ സ്റ്റോറില് സമ്പൂര്ണ പ്ലസ് എന്ന് നല്കി ഈ മൊബൈല് ആപ്പ് സൗജന്യമായി ഡൗണ്ലോഡ് ചെയ്യാവുന്നതാണ്. സമ്പൂര്ണ പ്ലസ് പ്രയോജനപ്പെടുത്തുന്ന സ്കൂളുകളില് രക്ഷിതാവിന് സമ്പൂര്ണയില് നല്കിയിട്ടുള്ള മൊബൈല് നമ്പര് ഉപയോഗിച്ച് ലോഗിന് ചെയ്യാന് കഴിയും. സമ്പൂര്ണ പ്ലസിന്റെ ആദ്യഘട്ട വിന്യാസം താത്പര്യം പ്രകടിപ്പിക്കുന്ന സ്കൂളുകളിലായിരിക്കും. ജില്ലഅസംബ്ലി മണ്ഡലംതദ്ദേശസ്വയംഭരണ സ്ഥാപനം എന്നിങ്ങനെയും പ്രത്യേക താത്പര്യമെടുത്ത് ഇത് നടപ്പാക്കാവുന്നതാണെന്നും ഇക്കാര്യത്തില് എംഎല്എമാര്ക്കും മറ്റ് ജനപ്രതിനിധികള്ക്കും മുന്കൈ എടുക്കാവുന്നതാണെന്നും മന്ത്രി പറഞ്ഞു. ഇതിനുള്ള വിശദാംശങ്ങള് കൈറ്റ് പ്രത്യേകം പ്രസിദ്ധീകരിക്കും.
ലിറ്റില് കൈറ്റ്സ്
ഐടി ക്ലബ് പൊതു വിദ്യാഭ്യാസ വകുപ്പ് നടപ്പാക്കുന്ന ലിറ്റില് കൈറ്റ്സ് ഐടി ക്ലബില് ചേരാന് എട്ടാം ക്ലാസ് വിദ്യാര്ഥികള്ക്കിടയില് നടത്തിയ പരീക്ഷയുടെ ഫലം പ്രസിദ്ധീകരിച്ചു. ആകെ 62000 പേരെയാണ് തെരെഞ്ഞെടുത്തിരിക്കുന്നത്. 1211590 വിദ്യാര്ഥികളായിരുന്നു പരീക്ഷ എഴുതിയത്. പരീക്ഷ ഫലം ലിറ്റില് കൈറ്റ്സ് ലോഗിനില് ലഭ്യമാണ്. ലിറ്റില് ഗൈഡ്സ് പ്രവര്ത്തനങ്ങളില് എ ഗ്രേഡ് ലഭിക്കുന്നവര്ക്ക് എസ്എസ്എല്സി പരീക്ഷയില് ഗ്രേസ് മാര്ക്ക് ഉണ്ട്.
