പണ്ഡിതരത്നം ഡോ.ശ്രീവരാഹം ചന്ദ്രശേഖരന് നായര്
ഒരു കാര്യം ഒരുവന് നേരിട്ട് ബോദ്ധ്യമായി എന്നതുകൊണ്ടു മാത്രം അതു സത്യമല്ല. സത്യം അതില് നിന്നെല്ലാം എത്രയോ ഉപരിയാണ്. അക്കാര്യമാണ് ഈ ദൃഷ്ടാന്തത്തിലൂടെ ശ്രീശങ്കരന് വ്യക്തമാക്കുന്നത്.
ദിവാന്ധ ദൃഷ്ടേഷു ദിവാന്തകാരഃ
പ്രത്യക്ഷ സിദ്ധോളപി സ കിം യഥാര്ത്ഥ: തദ്വത്………
സര്വവേദാന്ത സിദ്ധാന്ത സാരസംഗ്രഹം 286
വെളിച്ചത്ത് കാഴ്ചയില്ലാത്തവയ്ക്ക് പകലില് ഇരുട്ട് പ്രത്യക്ഷമാണെങ്കിലും അത് സത്യമാണോ? അതുപോലെ….
ഈ ലോകം മായാമോഹിതമായ ദൃഷ്ടിയിലൂടെയാണ് ആളുകള് കാണുന്നത്. അതുകൊണ്ട് തന്നെ ആ അറിവ് അവാസ്തവവും ആണ്. ഈ മായാവലയത്തില് നിന്നും എന്ന് മനുഷ്യര് മോചിതരാവുന്നുവോ അന്നുമാത്രമേ അവര് അജ്ഞാനത്തിന്റെ വ്യാളിപിടിത്തത്തില് നിന്നും രക്ഷപ്പെടുകയുള്ളു. മായാജന്യമായ അറിവ് ഒരുവന് നേരിട്ട് കിട്ടിയതാണ് എന്ന കാരണത്താല് അത് വാസ്തവമാണെന്ന് പറയാന് പറ്റുകയില്ല. ഭ്രാന്തനുമാത്രമേ അത് വാസ്തവമാണെന്ന് പറയാന് പറ്റുകയുള്ളൂ. സമചിത്തതയുള്ളവന് അത് അജ്ഞാനമാണ്. ഈ ആശയമാണ് പ്രകൃത ദൃഷ്ടാന്തത്തിലൂടെ ശ്രീശങ്കരന് വ്യക്തമാക്കുന്നത്.
പകല് മൂങ്ങയ്ക്ക് അന്ധകാരമാണ്. അത് അതിന്റെ ജന്മസിദ്ധമായ ഒരു പ്രത്യേകതയാണ്. അതുകൊണ്ട് രാത്രിയില് മറ്റുള്ള ജീവികള് ഉറങ്ങുമ്പോള് പകല് സമയത്താണ് മൂങ്ങ ഉറങ്ങുന്നത്. പകല് വെളിച്ചത്തെ ഇരുട്ടായിട്ടാണ് മൂങ്ങ കാണുന്നത്. ഈ നിലയില് പകല് ഇരുട്ടാണ് എന്ന ജ്ഞാനം മൂങ്ങയെ സംബന്ധിച്ചിടത്തോളം പ്രത്യക്ഷസിദ്ധമാണ്. അതുകൊണ്ടു അത് തികഞ്ഞ വാസ്തവവും. മൂങ്ങയ്ക്ക് പകല് വെളിച്ചം ഇരുട്ട് എന്ന നിലയില് പ്രത്യക്ഷസിദ്ധമായ സത്യമായതുകൊണ്ട് നമുക്കും അത് സത്യമാണോ? അല്ലേ അല്ല. മൂങ്ങയുടെ ഈ അറിവുപോലെയാണ് ഭ്രമജ്ഞാനത്തിനധീനമായ മൂഢാത്മാക്കളുടെ അറിവ് എന്നാണ് ശ്രീശങ്കരന് പറയുന്നത്. നിതാന്ത സത്യം പ്രത്യക്ഷത്തിനുപരിയാണ്. ഒരു ലക്ഷം യോജനയെങ്കിലും സൂര്യനു വലിപ്പമുണ്ട്. എന്നാല് നാം സൂര്യനെ കാണുന്നതോ ? ഒരു ചാണ് മാത്രം വലുപ്പമുള്ളതായി. സൂര്യനു ഒരു ചാണ് വലുപ്പമുണ്ടെന്ന് പ്രത്യക്ഷബോദ്ധ്യമായി എന്ന കാരണത്താല് ആ അറിവ് ശരിയാണോ എന്ന് ശ്രീ ശങ്കരന് തന്നെ ഇവിടെ(സ.വേ.സി-286)ചോദിയ്ക്കുന്നുണ്ട്.
സത്യം ഒരു ജ്ഞാനേന്ദ്രിയം കൊണ്ടും അറിയാന് സാദ്ധ്യമായതല്ല. അപരിമേയമായ സത്യം പരിമിതമായ ഇന്ദ്രിയങ്ങളുടെ ഗ്രാഹകശക്തിയ്ക്ക് എത്രയോ അകലെയാണ്. ആകയാല് പ്രത്യക്ഷസിദ്ധമായ ഒന്നും സത്യമല്ലെന്ന് ബോദ്ധ്യപ്പെട്ട് നിതാന്ത സത്യം കണ്ടെത്തുകയും അതില് സായൂജ്യം അടയുകയുമാണ് പരമപുരുഷാര്ത്ഥസിദ്ധി.
Discussion about this post