ചെന്നൈ: ഹരിത വിപ്ലവത്തിന്റെ പിതാവ് ഡോ.എം.എസ് സ്വാമിനാഥന്‍(98) അന്തരിച്ചു. ഇന്ന് രാവിലെ 11.20ന് ചെന്നൈയിലായിരുന്നു അന്ത്യം. ഭാരതത്തെ കാര്‍ഷിക സ്വയം പര്യാപ്തയിലേക്ക് നയിച്ച പ്രതിഭയായാണ് പാതി മലയാളിയായിരുന്നു സ്വാമിനാഥന്‍.
ആലപ്പുഴയിലെ മങ്കൊന്പാണ് ജന്മദേശം. നിലവില്‍ തിരുവനന്തപുരം യൂണിവേഴ്സിറ്റി കോളജ് ആയിമാറിയ പഴയ മഹാരാജാസ് കോളജില്‍ ആയിരുന്നു ബിരുദ പഠനം. തുടര്‍ന്ന് ഗവേഷണ മേഖലയിലേക്ക് തിരിഞ്ഞ സ്വാമിനാഥന്‍ ലോകമറിയപ്പെടുന്ന ശാസ്ത്രജ്ഞനായി മാറുകയായിരുന്നു. ടൈം മാഗസിന്‍ പുറത്തുവിട്ട, ഇരുപതാം നൂറ്റാണ്ടില്‍ ഏഷ്യയിലെ ഏറ്റവും സ്വാധീന ശക്തിയുള്ള 20 പേരുടെ പട്ടികയിലും സ്വാമിനാഥന്‍ ഇടംപിടിച്ചു.
1972 മുതല്‍ 79 വരെ ഇന്ത്യന്‍ കാര്‍ഷിക ഗവേഷണ കൗണ്‍സിലിന്റെ ഡയറക്ടര്‍ ജനറലായിരുന്ന സ്വാമിനാഥന്‍ രാജ്യാന്തര നെല്ലുഗവേഷണ കേന്ദ്രത്തില്‍ ഡയറക്ടര്‍ ജനറല്‍, ഇന്റര്‍നാഷണല്‍ യൂണിയന്‍ ഫോര്‍ ദി കണ്‍സര്‍വേഷന്‍ ഓഫ് നേച്ചര്‍ ആന്‍ഡ് നാച്ചുറല്‍ റിസോഴ്സ് പ്രസിഡന്റ്, ദേശീയ കര്‍ഷക കമ്മീഷന്‍ ചെയര്‍മാന്‍ തുടങ്ങിയ നിലകളിലും മികവു തെളിയിച്ചു.
പത്മശ്രീ,പത്മഭൂഷണ്‍, പത്മവിഭൂഷണ്‍ എന്നീ ബഹുമതികള്‍ നല്‍കി രാജ്യം സ്വാമിനാഥനെ ആദരിച്ചു. മാഗ്‌സസെ അവാര്‍ഡ് ഉള്‍പ്പെടെ നിരവധി അന്താരാഷ്ട്ര ബഹുമതികളും ഇദ്ദേഹത്തെ തേടിയെത്തി. 1987ല്‍ ലോക ഭക്ഷ്യ പുരസ്‌കാരത്തിന്റെ ആദ്യത്തെ സ്വീകര്‍ത്താവും സ്വാമിനാഥനായിരുന്നു.
84 രാജ്യങ്ങളില്‍ നിന്നു ഡോക്ടറേറ്റുകള്‍, മെന്‍ഡല്‍ മെമ്മോറിയല്‍ മെഡല്‍, ആല്‍ബര്‍ട്ട് ഐന്‍സ്റ്റീന്‍ വേള്‍ഡ് സയന്‍സ് അവാര്‍ഡ്, ടൈലര്‍ പ്രൈസ് ഫോര്‍ എന്‍വിയോണ്‍മെന്റല്‍ അച്ചീവ്‌മെന്റ് തുടങ്ങിയവ നേട്ടങ്ങളില്‍ ചിലതാണ്.
50 ഇയേഴ്‌സ് ഓഫ് ഗ്രീന്‍ റെവല്യൂഷന്‍, സയന്‍സ് ആന്‍ഡ് സസ്റ്റെയിനബിള്‍ ഫൂഡ് സെക്യൂരിറ്റി, കോംബാറ്റിംഗ് ഹംഗര്‍ ആന്‍ഡ് ഫൂഡ് സെക്യൂരിറ്റി തുടങ്ങിയ നിരവധി പുസ്തകങ്ങളും രചിച്ചിട്ടുണ്ട്.
Discussion about this post