ഇടുക്കി: വണ്ടിപ്പെരിയാറില്‍ ആറുവയസുകാരിയെ പീഡനത്തിനിരയാക്കി കൊലപ്പെടുത്തിയ കേസില്‍ പ്രതിയെ കുറ്റവിമുക്തനാക്കിയ കോടതി വിധിക്കെതിരെ പ്രോസിക്യൂഷന് അടുത്തയാഴ്ച അപ്പീല്‍ നല്‍കും. നിലവിലെ വിധി റദ്ദ് ചെയ്യണമെന്ന ആവശ്യവും ഉന്നയിക്കും. അതിനിടെ, കോടതി വിധിയില്‍ കുട്ടിയുടെ കുടുംബം പ്രതിഷേധത്തിനൊരുങ്ങുകയാണ്.
പൊലീസ് സ്റ്റേഷന് മുന്നിലാണു കുട്ടിയുടെ കുടുംബം പ്രതിഷേധം നടത്തുന്നത്. ഇന്ന് പത്തരയോടെ പ്രതിഷേധം ആരംഭിക്കും. പ്രതി അര്‍ജുനിനെ കുറ്റവിമുക്തനാക്കിയ വിധി റദ്ദാക്കണമെന്നാണ് കുടുംബം ആവശ്യപ്പെടുന്നത്. കേസ് സംബന്ധിച്ച ഫയലുകള്‍ സ്‌പെഷ്യല്‍ പബ്ലിക് പ്രോസിക്യൂട്ടര്‍ ഇന്ന് ഡയറക്ടര്‍ ജനറല്‍ ഓഫ് പ്രോസിക്യൂഷന് കൈമാറും. ഡി.ജി.പിയുടെ ഓഫീസിലെ നിയമവിദഗ്ദ്ധരുമായി കൂടിയാലോചിച്ച ശേഷമാകും അപ്പീല്‍ തയ്യാറാക്കുക. വണ്ടിപ്പെരിയാര്‍ കേസില്‍ കട്ടപ്പന അതിവേഗ കോടതിയാണ് തെളിവുകളുടെ അഭാവത്തില്‍ പ്രതിസ്ഥാനത്തുണ്ടായിരുന്ന അര്‍ജുനിനെ വെറുതെവിട്ടത്.
മേല്‍ക്കോടതിയില്‍നിന്ന് നീതി ലഭിക്കുമെന്നും തെളിവുകള്‍ ആവശ്യത്തിനുണ്ടെന്നുമാണ് പ്രോസിക്യൂഷന്റെ അവകാശവാദം. അപ്പീല്‍ നല്‍കണമെന്നാണ് കുട്ടിയുടെ ബന്ധുക്കളുടെയും ആവശ്യം. കേസില്‍ നിയമസഹായം നല്‍കുമെന്ന് കോണ്‍ഗ്രസ് നേതൃത്വവും അറിയിച്ചിട്ടുണ്ട്.
Discussion about this post