തിരുവനന്തപുരം: നാലാമത് പരമേശ്വര്‍ജി സ്മാരക പ്രഭാഷണത്തിനായി ഉപരാഷ്ട്രപതി ജഗ്ദീപ് ധന്‍കര്‍ മാര്‍ച്ച് രണ്ടിന് അനന്തപുരിയിലെത്തുന്നു.’ജനാധിപത്യം, ജനസംഖ്യ, വികസനം, ഭാരതത്തിന്റെ ഭാവി’ എന്ന വിഷയത്തിലാണ് ഉപരാഷ്ട്രപതി പ്രഭാഷണം നടത്തുന്നത്.
തിരുവനന്തപുരം കവടിയാര്‍ ഉദയ പാലസ്സ് കണ്‍വെന്‍ഷന്‍ സെന്ററിലാണ് പ്രഭാഷണം സംഘടിപ്പിച്ചിരിക്കുന്നത്. മാര്‍ച്ച് 2 ഞായര്‍ രാവിലെ 11 മണിക്കാണ് പ്രഭാഷണം. ഭാരതീയ വിചാര കേന്ദ്രമാണ് പ്രഭാഷണം സംഘടിപ്പിച്ചിരിക്കുന്നത്.
രാഷ്ട്രിയ സ്വയംസേവക സംഘത്തിന്റെ മുതിര്‍ന്ന പ്രചാരകന്‍, സംഘ പരിവാര്‍ പ്രസ്ഥാനങ്ങളുടെ കേരളത്തിലെ ബൗദ്ധിക മുഖം എന്നീ നിലകളില്‍ പ്രശസ്തനായിരുന്ന പരമേശ്വര്‍ജി എന്നറിയപ്പെട്ടിരുന്ന പി. പരമേശ്വരന്‍ 2020 ഫെബ്രുവരി 9 നാണ് അന്തരിച്ചത്.
കഴിഞ്ഞ ആറുപതിറ്റാണ്ടുകളായി കേരളത്തിലെ സാംസ്‌കാരിക മണ്ഡലത്തിലെ സജീവ സാന്നിധ്യമായിരുന്നു അദ്ദേഹം. ഭാരതീയ ദര്‍ശനങ്ങളില്‍ പഠനങ്ങള്‍ നടത്തിയതോടൊപ്പം കമ്മ്യൂണിസം പോലുള്ള പ്രത്യയ ശാസ്ത്രങ്ങളെ കുറിച്ചും പാണ്ഡിത്യം നേടിയിരുന്നു, വാഗ്മി, എഴുത്തുകാരന്‍, കവി എന്നീ നിലകളില്‍ പ്രശസ്തനായിരുന്നു. അദ്ദേഹത്തിന്റെ സ്മരണാര്‍ത്ഥം ഭാരതീയ വിചാര കേന്ദ്രം കഴിഞ്ഞ ഏതാനും വര്‍ഷങ്ങളായി പരമേശ്വര്‍ജി സ്മാരക പ്രഭാഷണം സംഘടിപ്പിച്ചു വരുന്നു.
