തിരുവനന്തപുരം: രാഹുല് മാങ്കൂട്ടത്തിലിനെതിരെ പരാതി നല്കിയ അതിജീവിതയെ അധിക്ഷേപിച്ച കേസില് രാഹുല് ഈശ്വര് അറസ്റ്റില്. ചോദ്യം ചെയ്യലിന് ശേഷമാണ് രാഹുലിനെ അറസ്റ്റ് ചെയ്തത്. ഐടി ആക്ട് ഉള്പ്പെടെ വിവിധ വകുപ്പുകള് പ്രകാരമാണ് കേസെടുത്തിരിക്കുന്നത്. രാഹുലിനെ നാളെ രാവിലെ കോടതിയില് ഹാജരാക്കും. അതിജീവിതയ്ക്കെതിരെ അധിക്ഷേപ പരാമര്ശം നടത്തിയെന്ന് കണ്ടെത്തിയതിനെ തുടര്ന്ന് ജാമ്യമില്ലാ വകുപ്പ് ചേര്ത്താണ് അറസ്റ്റ് രേഖപ്പെടുത്തിയത്.
രാഹുലിന്റെ ലാപ്ടോപ്പും, ഫോണും കസ്റ്റഡിയിലെടുത്ത് പരിശോധിച്ചു. അതിജീവിതയുടെ പരാതിയെ തുടര്ന്ന് ഇന്ന് വൈകിട്ടാണ് രാഹുലിനെ തിരുവനന്തപുരത്തുള്ള വീട്ടിലെത്തി പൊലീസ് കസ്റ്റഡിയിലെടുത്തത്. ചാനല് ചര്ച്ചയ്ക്കിടെയാണ് അതിജീവിതയെ കുറിച്ചുള്ള വിവരങ്ങള് രാഹുല് ഈശ്വര് പുറത്തുവിട്ടത്. സമൂഹമാദ്ധ്യമങ്ങളിലൂടെയും രാഹുല് ഈശ്വര് അതിജീവിതക്കെതിരെ ആരോപണങ്ങള് ഉന്നയിച്ചിരുന്നു. തുടര്ന്നാണ് യുവതി പരാതി നല്കിയത്.
