തിരുവനന്തപുരം: ശ്രീരാമനവമി മഹോത്സവത്തിന്റെ ഭാഗമായി ചേങ്കോട്ടുകോണം ശ്രീരാമദാസ ആശ്രമത്തിലെ ജ്യോതിക്ഷേത്ര സന്നിധിയില്‍ മാര്‍ച്ച് 26-ാം തീയതി വൈകുന്നേരം 5:30ന് ശ്രീരാമനവമി സമ്മേളനം പ്രസിദ്ധ ചലച്ചിത്രതാരം സന്തോഷ്.കെ.നായര്‍ ഉദ്ഘാടനം ചെയ്യും. ശ്രീരാമദാസ മിഷന്‍ അദ്ധ്യക്ഷന്‍ ശ്രീശക്തി ശാന്താനന്ദ മഹര്‍ഷി തൃപ്പാദങ്ങള്‍ അദ്ധ്യക്ഷത വഹിക്കുന്ന സമ്മേളനത്തില്‍ വാഴൂര്‍ തീര്‍ത്ഥപാദാശ്രമം മഠാധിപതി സ്വാമി പ്രജ്ഞാനാനന്ദ തീര്‍ത്ഥപാദര്‍ അനുഗ്രഹപ്രഭാഷണം നടത്തും. ഗവ.ആയൂര്‍വേദ കോളെജ് അസി.പ്രൊഫ. ഡോ.ലക്ഷ്മി വിജയന്‍.വി.ടി പ്രഭാഷണം നടത്തും. ശ്രീരാമനവമി രഥയാത്ര ചീഫ് ഓര്‍ഗനൈസര്‍ ബ്രഹ്മചാരി പ്രവിത്ത്, എസ്.ആര്‍.ഡി.എം.യൂ.എസ് അദ്ധ്യക്ഷന്‍ എസ്.കിഷോര്‍കുമാര്‍ തുടങ്ങിയവര്‍ സംസാരിക്കും.
ശ്രീരാമനവമി സമ്മേളനത്തിന് മുന്നോടിയായി 2.00 മുതല്‍ വേദിയില്‍ ബാംസുരി ഗ്രൂപ്പ് ഓഫ് കര്‍ണാട്ടിക് മ്യൂസിക് അവതരിപ്പിക്കുന്ന സംഗീത സദസ്സ്. 4.00ന് പേരൂര്‍ ദേവഗീതം ഭജന്‍സിന്റെ ഭജന ഉണ്ടായിരിക്കും. ശ്രീരാമനവമി സമ്മേളനത്തിന് ശേഷം വൈകുന്നേരം 7.00ന് വട്ടിയൂര്‍ക്കാവ് മാധവ് സ്‌കൂള്‍ ഓഫ് മ്യൂസിക്-കോട്ടയം സന്തോഷ് കുമാര്‍ നയിക്കുന്ന ഭജന്‍ സന്ധ്യ, 7.50ന് ചേങ്കോട്ടുകോണം സിആര്‍എ കലാവേദിയുടെ തിരുവാതിരക്കളി, 8.20ന് ഞാണ്ടൂര്‍ക്കോണം മേലെമുക്ക് ടീംചിലങ്ക അവതരിപ്പിക്കുന്ന കൈകൊട്ടിക്കളി, 8.45ന് ഞാണ്ടൂര്‍ക്കോണം ശ്രീഭദ്രയുടെ കൈകൊട്ടിക്കളി എന്നിവ നടക്കും.
ശ്രീരാമനവമി ദിനമായ മാര്‍ച്ച് 27ന് രാവിലെ 9:00 ന് നവമി പൊങ്കാല, ഉച്ചയ്ക്ക് 12:00ന് നവമി സദ്യ, വൈകുന്നേരം 4:00ന് ആശ്രമത്തില്‍ ഡാന്‍സ്, 6:00ന് പാദുകസമര്‍പ്പണ ശോഭായാത്ര കിഴക്കേകോട്ട അഭേദാശ്രമത്തില്‍ നിന്നും ആരംഭിച്ച് പാളയം ഹനുമത് ക്ഷേത്രത്തിലെത്തി പാദുകസമര്‍പ്പണം നടത്തും. തുടര്‍ന്ന് രഥഘോഷയാത്ര ശ്രീരാമദാസ ആശ്രമത്തിലേക്ക് പോകും. രാത്രി 7:00ന് നവമിപൂരം, രാത്രി 10:00ന് ആശ്രമത്തില്‍ ചപ്രങ്ങളില്‍ അഭിഷേകം. മാര്‍ച്ച് 28ന് വെളുപ്പിന് 4:00 മണിക്ക് ശ്രീശക്തി ശാന്താനന്ദ മഹര്‍ഷി തൃപ്പാദങ്ങളുടെ മുഖ്യകാര്‍മികത്വത്തില്‍ നടക്കുന്ന ശ്രീരാമപട്ടാഭിഷേകത്തോടെ ആഘോഷ പരിപാടികള്‍ സമാപിക്കും.
