ന്യൂഡല്‍ഹി: സോഷ്യല്‍ മീഡിയകളില്‍ സര്‍ക്കാര്‍ ഉദ്യോഗസ്ഥര്‍ ഹിന്ദി ഉപയോഗിക്കണമെന്ന കേന്ദ്രസര്‍ക്കാര്‍ ഉത്തരവിനെതിരെ തമിഴ്‌നാട് മുഖ്യമന്ത്രി ജയലളിത. തീരുമാനം പുനഃപരിശോധിക്കണമെന്നാവശ്യപ്പെട്ട് ജയലളിത കേന്ദ്രത്തിന് കത്തയച്ചു. കേന്ദ്രത്തിന്റെ തീരുമാനം അംഗീകരിക്കാനാകില്ലെന്നും, ഭരണഭാഷയായ ഇംഗ്ലീഷ് ഉപയോഗിക്കാന്‍ ഉദ്യോഗസ്ഥരെ അനുവദിക്കണമെന്നും ജയലളിത കത്തില്‍ സൂചിപ്പിക്കുന്നു. ഭാഷാ പാരമ്പര്യം കാത്തുസൂക്ഷിക്കുന്നവരാണ് തമിഴ്‌നാട്ടുകാര്‍ എന്നും ജയലളിത കേന്ദ്രത്തിനയച്ച കത്തില്‍ എടുത്തുപറയുന്നു. സര്‍ക്കാര്‍ ഉദ്യോഗസ്ഥര്‍ ഔദ്യോഗിക ആവശ്യങ്ങള്‍ക്ക് സോഷ്യല്‍ സൈറ്റുകളില്‍ ഹിന്ദി ഭാഷ ഉപയോഗിക്കണമെന്ന കേന്ദ്ര സര്‍ക്കാരിന്റെ സര്‍ക്കുലര്‍ കഴിഞ്ഞദിവസം പുറത്തിറക്കിയിരുന്നു.
ഹിന്ദിയോ ഇംഗ്ലീഷോ ഉപയോഗിക്കുമ്പോള്‍ ഹിന്ദിക്ക് പ്രാമുഖ്യം നല്‍കണം എന്ന് ഉത്തരവില്‍ പറഞ്ഞിരുന്നു. കഴിഞ്ഞദിവസം കേന്ദ്രസര്‍ക്കാരിന്റെ ഉത്തരവിനെതിരെ ഡിഎംകെ നേതാവ് കരുണാനിധി രംഗത്തുവന്നിരുന്നു.
