പാലക്കാട്ട് സംസ്ഥാന പട്ടികജാതി-വര്ഗ വകുപ്പിനു കീഴില് ആരംഭിക്കുന്ന മെഡിക്കല് കോളേജില് 100 സീറ്റുകള്ക്ക് അംഗീകാരം
തിരുവനന്തപുരം: കേരളത്തിലെ നാലു സര്ക്കാര് മെഡിക്കല് കോളേജുകളിലായി 200 പുതിയ എംബിബിഎസ് സീറ്റുകള്ക്ക് ഇന്ത്യന് മെഡിക്കല് കൗണ്സില് അംഗീകാരം നല്കി. ഇന്നലെയാണ് ഇതു സംബന്ധിച്ച ഉത്തരവ് കേന്ദ്ര ആരോഗ്യമന്ത്രാലയം പുറത്തിറക്കിയത്. പുതുതായി ആരംഭിക്കുന്ന ഇടുക്കി, പാലക്കാട് മെഡിക്കല് കോളേജുകളില് ഉള്പ്പെടെയാണു സീറ്റ് അനുവദിച്ചത്.
പാലക്കാട്ട് സംസ്ഥാന പട്ടികജാതി-വര്ഗ വകുപ്പിനു കീഴില് ആരംഭിക്കുന്ന മെഡിക്കല് കോളേജില് 100 സീറ്റുകള്ക്ക് അംഗീകാരം നലകി. ഇടുക്കി പൈനാവില് ആരംഭിക്കുന്ന മെഡിക്കല് കോളേജില് 50 വിദ്യാര്ഥികളെ പ്രവേശിപ്പിക്കുന്നതിന് അനുമതി നല്കി. മഞ്ചേരി മെഡിക്കല് കോളേജില് 100 സീറ്റുകള് അംഗീകരിച്ചു.
കോഴിക്കോട് മെഡിക്കല് കോളേജില് നിലവിലുള്ള 200 സീറ്റുകള് 250 ആയി വര്ധിപ്പിക്കുന്നതിനും ഇന്ത്യന് മെഡിക്കല് കൗണ്സില് അംഗീകാരം നല്കി. മെഡിക്കല് കൗണ്സില് ഓഫ് ഇന്ത്യയുടെ ശിപാര്ശ പ്രകാരമാണു മെഡിക്കല് സീറ്റ് വര്ധിപ്പിക്കാനും വെട്ടിക്കുറയ്ക്കാനും കേന്ദ്ര ആരോഗ്യ മന്ത്രാലയം നടപടിയെടുത്തത്. ശ്രീവല്സം എഡ്യൂക്കേഷന് ട്രസ്റ്റ് – മലപ്പുറം, റോയല് മെഡിക്കല് ട്രസ്റ്റ് – പാലക്കാട്, എസ്ആര് എഡ്യൂക്കേഷന് ട്രസ്റ്റ് – തിരുവനന്തപുരം എന്നിവ പുതുതായി സ്വാശ്രയ മേഖലയില് മെഡിക്കല് കോളേജിനായി നല്കിയ അപേക്ഷ ഇന്ത്യന് മെഡിക്കല് കൗണ്സില് അംഗീകരിച്ചില്ല. തിരുവനന്തപുരം കാരക്കോണം സിഎസ്ഐ മെഡിക്കല് കോളേജില് 50 എംബിബിബിഎസ് സീറ്റുകള്കൂടി അനുവദിക്കണമെന്ന അപേക്ഷയും നിരാകരിക്കപ്പെട്ടു.
അടിസ്ഥാന സൗകര്യമില്ലെന്നു കണ്ടെത്തിയ രാജ്യത്തെ 118 മെഡിക്കല് കോളേജുകളിലെ 3820 സീറ്റുകള് ഈ വര്ഷം കുറവു ചെയ്തു. മെഡിക്കല് കൗണ്സില് ഓഫ് ഇന്ത്യ നടത്തിയ പരിശോധനയുടെ അടിസ്ഥാനത്തിലാണ് എംബിബിഎസ് സീറ്റുകള് വെട്ടിക്കുറയ്ക്കാന് നടപടിയെടുത്തിരിക്കുന്നത്. പാലക്കാട്, ഇടുക്കി മെഡിക്കല് കോളേജുകളില് ഈ വര്ഷംതന്നെ പ്രവേശനം നടക്കും. മലപ്പുറം മഞ്ചേരി മെഡിക്കല് കോളേജിലെ 100 സീറ്റില് ഈ വര്ഷവും പ്രവേശനം നടത്താമെന്നും കേന്ദ്രസര്ക്കാര് പുറത്തിറക്കിയ ഉത്തരവില് പറയുന്നു. പരിശോധനയില് അടിസ്ഥാനസൗകര്യങ്ങള് ഇല്ലെന്നു കണ്ടെത്തിയതിനെത്തുടര്ന്നു മഞ്ചേരി മെഡിക്കല് കോളേജിന്റെ അംഗീകാരം മെഡിക്കല് കൗണ്സില് രണ്ടാഴ്ച മുമ്പു റദ്ദാക്കിയിരുന്നു. ഇതിനെതിരേ സംസ്ഥാന സര്ക്കാര് നല്കിയ അപ്പീലിലാണു പുതിയ തീരുമാനമുണ്ടായത്.
Discussion about this post