ന്യൂഡല്ഹി: റെയില് ബജറ്റ് മന്ത്രി സുരേഷ് പ്രഭു പാര്ലമെന്റില് അവതരിപ്പിച്ചു. യാത്ര നിരക്കില് വര്ധനവരുത്താതെ റെയില്വയെ സ്വയംപര്യാപ്തമാക്കുന്നതിനുള്ള കര്മ്മപദ്ധതികള്ക്കാണ് ബജറ്റില് ഊന്നല് നല്കിയിരിക്കുന്നത്. ബജറ്റില് പുതിയ തീവണ്ടികളോ പാതയോ പ്രഖ്യാപിച്ചിട്ടില്ല. അടുത്ത അഞ്ചു വര്ഷത്തിനുള്ളില് സുരക്ഷ, സുഖയാത്ര, നവീകരണം, സാമ്പത്തിക സ്വയംപര്യാപ്തത തുടങ്ങിയ നാല് ലക്ഷ്യങ്ങളാണ് ബജറ്റ് വിഭാവനം ചെയ്യുന്നത്.പാതഇരട്ടിപ്പിക്കലിനും വൈദ്യുതീകരണത്തിനും ഊന്നല് നല്കി വേഗത്തില് സമയബന്ധിതമായി ട്രെയിന് ഓടിക്കുകയാണ് ലക്ഷ്യമെന്നും സുരേഷ് പ്രഭു പറഞ്ഞു. ട്രാക്കുകള് കൂട്ടുന്നതിനും ഗേജ് മാറ്റത്തിനും പാത ഇരട്ടിപ്പിക്കലിനും മറ്റുമായി ആകെ 96,182 കോടി രൂപ ബജറ്റില് നീക്കിവെച്ചിട്ടുണ്ട്. ആളില്ലാ ലെവല്ക്രോസുകള് അഞ്ചുവര്ഷം കൊണ്ട് ഒഴിവാക്കുമെന്നും ബജറ്റ് പറയുന്നു. ജനശതാബ്ദി ട്രെയിനുകളുടെ വേഗം കൂട്ടും. പുതിയ ട്രെയിനുകള് അനുവദിക്കുന്നതു സംബന്ധിച്ച് പഠനം നടന്നുകൊണ്ടിരിക്കുകയാണ്. ഈ പാര്ലമെന്റ് സമ്മേളനം അവസാനിക്കുന്നതിനു മുമ്പുതന്നെ പുതിയ തീവണ്ടികളുടെ പ്രഖ്യാപനം നടത്തുമെന്ന് റെയില് മന്ത്രി പറഞ്ഞു.120 ദിവസം മുമ്പ് മുന്കൂട്ടി ടിക്കറ്റ് റിസര്വ് ചെയ്യും. പ്രധാന ട്രെയിനുകളില് ജനറല് കോച്ചുകളുടെ എണ്ണം കൂട്ടും. മുതിര്ന്ന പൗരന്മാര്ക്കും ഗര്ഭിണികള്ക്കുമായി ട്രെയിനുകളില് ലോവര്ബര്ത്ത് ക്വാട്ട ഏര്പ്പെടുത്താനും ബജറ്റില് നിര്ദേശമുണ്ട്. തിരഞ്ഞെടുത്ത 108 ട്രെയിനുകളില് ഇഷ്ട ഭക്ഷണം ഐ.ആര്.സി.ടി.സി വഴി ലഭ്യമാക്കും. ജനറല് ,സ്ലീപ്പര് കോച്ചുകളില് മൊബൈല് ഫോണ്ചാര്ജ് ചെയ്യാന് കൂടുതല് സൗകര്യം ഏര്പ്പെടുത്തും. സ്ത്രീകളുടെ സുരക്ഷ ഉറപ്പുവരുത്തുന്നതിനായി പ്രത്യേക സംവിധാനം ഏര്പ്പെടുത്തും. സ്ത്രീ സുരക്ഷപ്രശ്നങ്ങള് 182 എന്ന നമ്പറില് വിളിച്ച് അറിയിക്കാം.
