മംഗലാപുരം: ശ്രീരാമദാസമിഷന്‍ യൂണിവേഴ്‌സല്‍ സൊസൈറ്റിയുടെയും ചേങ്കോട്ടുകോണം ശ്രീരാമദാസ ആശ്രമത്തിന്റെയും സംയുക്താഭിമുഖ്യത്തില്‍ നടക്കുന്ന ശ്രീരാമനവമി രഥയാത്രയ്ക്ക് ഭക്തിനിര്‍ഭരമായ തുടക്കം. കൊല്ലൂര്‍ ശ്രീമൂകാംബികാ ദേവീക്ഷേത്രത്തിലെ ശ്രീകോവിലില്‍ നിന്നും പകര്‍ന്ന ജ്യോതി ശ്രീരാമദാസ ആശ്രമം അദ്ധ്യക്ഷന്‍ ബ്രഹ്മശ്രീ സ്വാമി ബ്രഹ്മപാദാനന്ദ സരസ്വതി തൃപ്പാദങ്ങള്‍ ഏറ്റുവാങ്ങി ശ്രീരാമരഥത്തില്‍ പ്രതിഷ്ഠിച്ചതോടെ ഇക്കൊല്ലത്തെ ശ്രീരാമനവമി രഥയാത്രയ്ക്ക് തുടക്കമായി. ശ്രീരാമനവമി രഥയാത്ര ജനറല്‍ കണ്‍വീനര്‍ ബ്രഹ്മചാരി പ്രവിത് കുമാറും നിരവധി ആശ്രമഭക്തരും ഈ പുണ്യമുഹൂര്‍ത്തത്തിനു സാക്ഷ്യം വഹിച്ചു. ശ്രീരാമരഥത്തില്‍ ഭദ്രദീപപ്രതിഷ്ഠയ്ക്കു ശേഷം ബ്രഹ്മശ്രീ സ്വാമി ബ്രഹ്മപാദാനന്ദസരസ്വതി തൃപ്പാദങ്ങള്‍ അനുഗ്രഹപ്രഭാഷണം നടത്തി.
ശ്രീരാമനവമി രഥയാത്രയുടെ രജതജൂബിലി വര്‍ഷമായ ഇക്കൊല്ലം പുറത്തിറക്കുന്ന ‘ശ്രീരാമനവമി രഥയാത്ര – രജതജൂബിലി സുവനീര്‍’ സ്വാമി ബ്രഹ്മപാദാനന്ദ സരസ്വതി തൃപ്പാദങ്ങള്‍ ശ്രീനീകണ്ഠവിദ്യാപീഠം മാനേജര്‍ എം.അപ്പുക്കുട്ടന്‍നായര്‍ക്കു നല്‍കി പ്രകാശനം ചെയ്തു.
Discussion about this post