തിരുവനന്തപുരം: പോലീസ് സേനയിലെ ഒഴിവുകള് നികത്തുന്നതിനുളള ഊര്ജ്ജിത നടപടികളുടെ ഭാഗമായി ആയിരത്തി അഞ്ഞൂറോളം പേരടങ്ങുന്ന അടുത്ത ബാച്ചിന്റെ ട്രെയിനിങ് ഈ മാസം തന്നെ ആരംഭിക്കുമെന്ന് സംസ്ഥാന പോലീസ് മേധാവി ടി പി സെന്കുമാര് അറിയിച്ചു.
ഇതിനായി പി എസ് സി അഡൈ്വസ് ചെയ്ത 1466 പേര്ക്ക് നിയമന ഉത്തരവ് അയച്ച് വിവിധ യൂണിറ്റുകളില് റിപ്പോര്ട്ട് ചെയ്യാനാവശ്യപ്പെട്ടിരുന്നു. ഇതില് 1145 പേര് ഇതിനകം റിപ്പോര്ട്ട് ചെയ്തു കഴിഞ്ഞതായി ബറ്റാലിയന് എ ഡി ജി പി ഋഷിരാജ് സിങ് അറിയിച്ചു. പി.എസ്.സി അഡ്വൈസ് ലിസ്റ്റില്പെട്ട ഇനിയും റിപ്പോര്ട്ടു ചെയ്യാന് ബാക്കിയുള്ളവര് ബന്ധപ്പെട്ട യൂണിറ്റുകളില് എത്രയും വേഗം റിപ്പോര്ട്ടു ചെയ്യണമെന്ന് സംസ്ഥാന പോലീസ് മേധാവി നിര്ദേശിച്ചു. വിവിധ യൂണിറ്റുകളില് യഥാക്രമം റിപ്പോര്ട്ട് ചെയ്യാനായി നിയമന ഉത്തരവ് അയച്ചവരുടെയും അതില് റിപ്പോര്ട്ട് ചെയ്തവരെയും എണ്ണം എം എസ് പി -180- 147, എസ് എ പി-255-183, കെ എ പി 1 -138 – 112, കെ എ പി 2 – 97 – 74, കെ എ പി 3 – 384 – 256, കെ എ പി 4 – 310 – 283, കെ എ പി 5 – 102 – 90. ഇതിനുപുറമേ 1900 പേരടങ്ങുന്ന ഒരു ബാച്ചിന്റെ ട്രെയിനിങ് ഒക്ടോബറില് ആരംഭിക്കും, ഇപ്പോള് ട്രെയിനിങ് പൂര്ത്തിയാകുന്ന 916 പേരുടെ പാസ്സിങ് ഔട്ട് ഈ മാസം നടക്കും. ഇതുള്പ്പെടെ ആകെ 4503 പേരുടെ ഒഴിവുകളാണ് പോലീസ് സേനയില് ഇപ്പോള് ഉളളത്. ഇവ എത്രയുംവേഗം നികത്താനും വിവിധ ബറ്റാലിയന് യൂണിറ്റുകള് പൂര്ണ്ണ സജ്ജമാക്കാനും അടിയന്തര നടപടി സ്വീകരിച്ചു വരുന്നതായും സംസ്ഥാന പോലീസ് മേധാവി അറിയിച്ചു.
