തിരുവനന്തപുരം: വിദ്യാലയങ്ങളിലാണ് ഭാവിതലമുറ നിലനില്‍ക്കുന്നതെന്നും ഇന്നത്തെ വിദ്യാര്‍ത്ഥികളാണ് നാളത്തെ പലരുമായി മാറുന്നതെന്നും സ്‌കൂളുകളെ ലഹരി മുക്തമാക്കുന്നതിന് നാട് ഒന്നിക്കണമെന്നും മുഖ്യമന്ത്രി പിണറായി വിജയന്‍ പറഞ്ഞു. ഉന്നത വിദ്യാഭ്യാസ വകുപ്പും എക്‌സൈസ് വകുപ്പും എന്‍സിസി ഡയറക്ടറേറ്റും സംയുക്തമായി സംഘടിപ്പിച്ച മദ്യത്തിനും മയക്കുമരുന്നിനുമെതിരെയുള്ള ബോധവത്കരണ സെമിനാറും പരിശീലനവും ഉദ്ഘാടനം ചെയ്യുകയായിരുന്നു മുഖ്യമന്ത്രി.
സമൂഹത്തിലെ വ്യത്യസ്ത ചുമതലകള്‍ വഹിക്കേണ്ടവരാണ് ഇന്നത്തെ വിദ്യാര്‍ത്ഥികള്‍. അവരെ ലഹരിക്കടിപ്പെടുത്താന്‍ ഒരു സംഘം പ്രവര്‍ത്തിക്കുന്നുണ്ട്.കേരളത്തില്‍ വ്യാപകമായി ആ സംഘമുണ്ട്. കുഞ്ഞുങ്ങളെ തെറ്റായ വഴിയിലേക്ക് തിരിച്ചുവിടുകയാണിവര്‍. ഡ്രഗ്‌സിന്റെ വാഹകരാവാന്‍ പോലും ഇവര്‍ കുട്ടികളെ ഉപയോഗിക്കുകയാണ്. പോലീസും നിയമവും ഇവര്‍ക്കെതിരെ പ്രവര്‍ത്തിക്കുന്നതിനൊപ്പം സമൂഹത്തിന്റെ ജാഗ്രതയും പ്രധാനമാണ്.
പുതിയ ആളുകളെ മയക്കുമരുന്നുകള്‍ക്കടിമപ്പെടുത്തുന്ന ഡ്രഗ്‌സ് മാഫിയ വിദ്യാലയങ്ങളെ കേന്ദ്രീകരിക്കുകയാണ്. വിദ്യാലയങ്ങളെ പൂര്‍ണമായും ലഹരിമുക്തമാക്കാന്‍ അധ്യാപകരും അധ്യാപക രക്ഷാകര്‍ത്തൃ സമിതികളും ജാഗരൂകരാവണം. സ്‌കൂളുകളുടെ പരിസരത്ത് അപരിചിതരായ ആളുകളുടെ സാമീപ്യമുണ്ടെങ്കിലോ സ്‌കൂളിനടുത്തുള്ള കടകള്‍ ഏതെങ്കിലും തരത്തിലുള്ള ലഹരിവില്‍പനയുമായി ബന്ധപ്പെടുന്നുണ്ടെങ്കിലോ അത് നിരീക്ഷിക്കുകയും തടയുകയും വേണം. സംസ്ഥാനത്ത് 80,000ല്‍പരം എന്‍സിസി കേഡറ്റുകളും 50,000ല്‍പരം സ്റ്റുഡന്റ് പോലീസ് കേഡറ്റുകളും വിദ്യാലയങ്ങളെ ലഹരിമുക്തമാക്കാനുള്ള തീവ്രയത്‌നത്തിലാണെന്നത് അഭിനന്ദനീയമാണന്നും മുഖ്യമന്ത്രി പറഞ്ഞു. നവകേരളത്തിനായുള്ള ലഹരി വിരുദ്ധ പ്രതിജ്ഞ മുഖ്യമന്ത്രി ചൊല്ലിക്കൊടുത്തു.
വിദ്യാഭ്യാസ വകുപ്പ് അടുത്ത അധ്യയനവര്‍ഷം മികവിന്റെ വര്‍ഷമായി ആചരിക്കുകയാണെന്നും വിദ്യാര്‍ത്ഥികള്‍ അക്കാദമിക് കാര്യങ്ങളില്‍ മാത്രമല്ല, എല്ലാ കാര്യങ്ങളിലും മികവുറ്റവരാകണമെന്നും അധ്യക്ഷത വഹിച്ച വിദ്യാഭ്യാസ മന്ത്രി പ്രൊഫ. സി. രവീന്ദ്ര നാഥ് പറഞ്ഞു. ലഹരിക്കെതിരെ പ്രതികരിക്കാനുള്ള ശ്രമങ്ങളെ എല്ലാവരും ഏറ്റെടുക്കണമെന്നും വിദ്യാഭ്യാസ മന്ത്രി പറഞ്ഞു.
എന്‍സിസി ഒഫീഷിയേറ്റ് അഡീഷണല്‍ ഡയറക്ടര്‍ ബ്രിഗേഡിയര്‍ സുനില്‍കുമാര്‍ എന്‍.വി. സ്വാഗതം പറഞ്ഞു. വി.എസ്. ശിവകുമാര്‍ എംഎല്‍എ, ഉന്നത വിദ്യാഭ്യാസ വകുപ്പ് പ്രിന്‍സിപ്പല്‍ സെക്രട്ടറി ഡോ. ഉഷാ ടൈറ്റസ്, എന്‍.സി.സി. ഡയറക്ടര്‍ കേണല്‍ രാജീവ് പി.ടി. തുടങ്ങിയവര്‍ സംബന്ധിച്ചു. ലഹരി വിരുദ്ധ ബോധവത്കരണ സൈക്കിള്‍ റാലി മുഖ്യമന്ത്രി ഫ്‌ളാഗ് ഓഫ് ചെയ്തു.
