തിരുവനന്തപുരം: ജഗദ്ഗുരു സ്വാമി സത്യാനന്ദസരസ്വതി തൃപ്പാദങ്ങളുടെ 83-ാം ജയന്തി ശ്രീരാമദാസാശ്രമം, ശ്രീരാമദാസമിഷന്‍, ശ്രീരാമദാസമിഷന്‍ യൂണിവേഴ്‌സല്‍ സൊസൈറ്റി എന്നീ പ്രസ്ഥാനങ്ങളുടെ ആഭിമുഖ്യത്തില്‍ വിവിധ ഹൈന്ദവ സംഘടനകളുടെ സഹകരണത്തോടെ വിശ്വശാന്തി ചതുര്‍ദശാഹയജ്ഞമായി സെപ്റ്റംബര്‍ 20 മുതല്‍ ഒക്ടോബര്‍ 3 വരെ കേരളത്തിലൂടനീളം വിപുലമായി ആഘോഷിക്കുന്നു.
14 ദിവസം നീണ്ടുനില്‍ക്കുന്ന ജയന്തി ആഘോഷപരിപാടികള്‍ സെപ്റ്റംബര്‍ 20ന് കണ്ണൂരിലെ വേളത്ത് തുടക്കമാകും. 21ന് വയനാട്, 22ന് കോഴിക്കോട്, 23ന് മലപ്പുറം, 24ന് പാലക്കാട്, 25ന് തൃശ്ശൂര്‍, 26ന് ഇടുക്കി, 27ന് പത്തനംതിട്ട, 28ന് എറണാകുളം, 29ന് കോട്ടയം, 30ന് ആലപ്പുഴ, ഒക്ടോബര്‍ ഒന്നിന് കൊല്ലം, 2ന് തിരുവനന്തപുരത്ത് കിഴക്കേകോട്ട അഭേദാശ്രമത്തില്‍ ശ്രീസത്യാനന്ദഗുരു സമീക്ഷ(ജയന്തി മഹാസമ്മേളനം) എന്നിവ നടക്കും. ശ്രീരാമദാസ മിഷന്‍ യൂണിവേഴ്‌സല്‍ സൊസൈറ്റി ചീഫ് ഓര്‍ഗനൈസര്‍ ബ്രഹ്മചാരി അരുണിന്റെ മുഖ്യകാര്‍മികത്വത്തില്‍ വിവിധ ജില്ലാകേന്ദ്രങ്ങളില്‍ ഗുരുപൂജ, ശ്രീരാമായണ പാരായണം, ഗണപതി ഹോമം, ഗുരുഗീതാ പാരായണം, സര്‍വമംഗളപൂജ, അമൃതഭോജനം, ശ്രീ സത്യാനന്ദഗുരു സമീക്ഷ, ഭജന, മംഗളാരതി എന്നിവ നടക്കും.
ഒക്ടോബര്‍ 3ന് ജയന്തി ദിനത്തില്‍ ചേങ്കോട്ടുകോണം ശ്രീരാമദാസ ആശ്രമത്തില്‍ ജ്യോതിക്ഷേത്രത്തില്‍ രാവിലെ ആരാധനയോടുകൂടി ചടങ്ങുകള്‍ ആരംഭിക്കും. തുടര്‍ന്ന് അഹോരാത്ര ശ്രീരാമായണ പാരായണം, ലക്ഷാര്‍ച്ചന, കഞ്ഞിസദ്യ, അമൃതഭോജനം, ചെണ്ടമേളം, ഭജന എന്നിവ നടക്കും. ശ്രീരാമദാസമിഷന്‍ അദ്ധ്യക്ഷന്‍ സ്വാമി ബ്രഹ്മപാദാനന്ദ സരസ്വതി ചടങ്ങുകള്‍ക്ക് മുഖ്യ കാര്‍മികത്വം വഹിക്കും. 4ന് രാവിലെ 3.30ന് ശ്രീരാമപട്ടാഭിഷേകത്തോടുകൂടി ജയന്തി ആഘോഷപരിപാടികള്‍ സമാപിക്കും.
Discussion about this post