മലപ്പുറം : വെന്നിയൂരില്‍ നിയന്ത്രണം വിട്ട കെഎസ്ആര്‍ടിസി ബസ് കടയിലേക്ക് ഇടിച്ചുകയറി ഇരുപതോളം പേര്‍ക്ക് പരിക്കേറ്റു. ഇന്ന് ഉച്ചയോടെ ആയിരുന്നു സംഭവം. തൃശ്ശൂരില്‍ നിന്ന് കോഴിക്കോട്ടേക്ക് പോകുകയായിരുന്നു ബസ്.
വെന്നിയൂരില്‍ വെച്ച് എതിരെവന്ന പിക്കപ്പ് വാനില്‍ ഇടിച്ച ശേഷം ബസിന്റെ നിയന്ത്രണം നഷ്ടമാകുകയായിരുന്നു. തുടര്‍ന്ന് മറ്റു രണ്ട് ബൈക്കുകളില്‍ ഇടിച്ച ശേഷം കടയിലേക്ക് പാഞ്ഞുകയറുകയായിരുന്നു. അപകടത്തില്‍ ബൈക്ക് യാത്രികര്‍ക്കും പിക്കപ്പ് വാന്‍ ഡ്രൈവര്‍ക്കും പരിക്കേറ്റിട്ടുണ്ട്. അപകടത്തില്‍ പരിക്കറ്റവരെ അടുത്തുള്ള ആശുപത്രികളില്‍ പ്രവേശിപ്പിച്ചു.
സംഭവം അറിഞ്ഞ ഉടന്‍ തിരൂരങ്ങാടി പോലീസും ഹൈവേ പോലീസും അപകട സ്ഥലത്തെത്തി. നാട്ടുകാരുടെയും പോലീസിന്റെയും നേതൃത്വത്തില്‍ സ്ഥലത്ത് രക്ഷാ പ്രവര്‍ത്തനം തുടരുകയാണ്.
