ന്യൂഡല്ഹി: അയോദ്ധ്യ രാമക്ഷേത്ര നിര്മാണ ട്രസ്റ്റ് രൂപീകരണം ഉടന് നടക്കുമെന്ന് സൂചന. പ്രധാനമന്ത്രി നരേന്ദ്രമോദിയുടെ അദ്ധ്യക്ഷതയില് ട്രസ്റ്റ് രൂപീകരണ യോഗം ഒരാഴ്ചയ്ക്കുള്ളില് നടക്കുമെന്നാണ് റിപ്പോര്ട്ടുകള്. സുപ്രീംകോടതി നിര്ദ്ദേശപ്രകാരം അയോദ്ധ്യയിലെ ചില പ്രദേശങ്ങള് ഏറ്റെടുത്തുള്ള 1993ലെ നിയമത്തിലെ 6, 7 വകുപ്പുകള് പ്രകാരമുള്ള അധികാരമുപയോഗിച്ച് ട്രസ്റ്റ് അല്ലെങ്കില് മറ്റൊരു സംവിധാനമുണ്ടാക്കാനാണ് നിര്ദ്ദേശം.
ഗുജറാത്തിലെ സോമനാഥ് ക്ഷേത്ര ട്രസ്റ്റാണ് കേന്ദ്രത്തിനു മുന്നിലെ പ്രധാന മാതൃക. കേന്ദ്ര, സംസ്ഥാന സര്ക്കാരുകളുടെ നാല് വീതം പ്രതിനിധികള് ഉള്പ്പെടുന്നതാണ് ഈ ട്രസ്റ്റ്. നിലവില് പ്രധാനമന്ത്രി നരേന്ദ്ര മോദി, ആഭ്യന്തര മന്ത്രി അമിത് ഷാ, എല്.കെ.അദ്വാനി തുടങ്ങിയവര് ട്രസ്റ്റ് ബോര്ഡില് അംഗങ്ങളാണ്. അയോദ്ധ്യ തര്ക്കഭൂമിയില് സര്ക്കാര് ട്രസ്റ്റിന് ക്ഷേത്രം നിര്മിക്കാമെന്നും സുന്നി വഖഫ് ബോര്ഡിന് അഞ്ചേക്കര് ഭൂമി ഏറ്റെടുത്ത് നല്കണമെന്നുമാണ് സുപ്രീം കോടതിയുടെ ചരിത്രവിധി. വഖഫ് ബോര്ഡിനു നല്കാന് നിര്ദേശിച്ച അഞ്ച് ഏക്കര് ഭൂമി, നിലവില് കേന്ദ്ര സര്ക്കാരിന്റെ കൈവശമുള്ളതില്നിന്നു തന്നെ കൊടുക്കുന്നതില് തടസമില്ലെന്ന് കോടതി വ്യക്തമാക്കിയിട്ടുണ്ട്.
അയോദ്ധ്യയില്തന്നെ പ്രധാനപ്പെട്ട സ്ഥലത്ത് അഞ്ചേക്കര് ഭൂമിയാണ് സുന്നി വഖഫ് ബോര്ഡിന് നല്കേണ്ടത്. ഈ ഭൂമിയില് ആരാധനാലയം നിര്മിക്കാം. ഭൂമി സംസ്ഥാന സര്ക്കാരോ കേന്ദ്രമോ ഏറ്റെടുത്ത് നല്കണം. തര്ക്കഭൂമിയില് ക്ഷേത്ര നിര്മാണത്തിന് മൂന്ന്മാസത്തിനുള്ളില് കേന്ദ്രസര്ക്കാര് ട്രസ്റ്റ് രൂപീകരിക്കണമെന്നും കോടതി ഉത്തരവിട്ടിരുന്നു. അതില് നിര്മോഹി അഖാഡയ്ക്ക് അര്ഹമായ പ്രാതിനിധ്യം ഉറപ്പാക്കണം. ഭൂമി മൂന്നായി വിഭജിച്ച അലഹബാദ് കോടതിവിധി നിലനില്ക്കുന്നതല്ലെന്നും ചീഫ്ജസ്റ്റിസ് അദ്ധ്യക്ഷനായ സുപ്രീംകോടതിയുടെ അഞ്ചംഗ ഭരണഘടനാ ബെഞ്ച് വിധിച്ചു. ചീഫ്ജസ്റ്റിസ് രഞ്ജന് ഗൊഗോയ്ക്കുപുറമേ ജസ്റ്റിസുമാരായ എസ്.എ ബോബ്ഡെ, ഡി.വൈ ചന്ദ്രചൂഡ്, അശോക് ഭൂഷണ്, എസ്.എ നസീര് എന്നിവരുള്പ്പെട്ട ബെഞ്ചിന്റേതാണ് വിധി. ഏകകണ്ഠമായ വിധിയാണ് പ്രസ്താവിച്ചത്.
