ലണ്ടന്: ലോക്ക് ഡൗണ് നിയന്ത്രണങ്ങളും സോഷ്യല് ഡിസ്റ്റന്സിംഗ് നിയമങ്ങളും കര്ശനമായി നിലനില്ക്കുന്നുവെന്നു പറയുമ്പോഴും ഇന്നലെ കൂട്ടംകൂടി ആളുകള് അനുകൂലമായ കാലാവസ്ഥ ആസ്വദിക്കാന് പുറത്തിറങ്ങിയതായാണ് വിവരം. ഇന്നലെ സൗത്ത് ലണ്ടനിലെ ബ്രോക്ക്വെല് പാര്ക്കില് മാത്രം ഏതാണ്ട് മൂവായിരത്തോളം പേര് എത്തിയതായി റിപ്പോര്ട്ടുകള് സൂചിപ്പിക്കുന്നു. പോലീസ് ഇവരെ വിരട്ടിയോടിച്ചെന്നും സസെക്സിലെ ഒരു പാര്ക്കില് ആളുകള് പിറന്നാള് ആഘോഷങ്ങള്ക്കായി എത്തിയെന്നും ലോക്കല് കൗണ്സില് പുറത്തിറക്കിയ ട്വീറ്റില് പറയുന്നു.ആളുകള് നിയമം പാലിക്കാതെ വരികയാണെങ്കില് വ്യായാമം ചെയ്യാനുള്ള അനുവാദം ഉള്പ്പെടെ പിന്വലിക്കുമെന്നു സര്ക്കാര് മുന്നറിയിപ്പ് നല്കി.
കെയര് ഹോമുകളില് പ്രായമുള്ളവര് താമസിക്കുന്ന കെയര് ഹോമുകളിലും മരണം സംഭവിക്കുന്നതായുള്ള വാര്ത്തകള് വന്നതോടെ കെയര് ഇന്ഡസ്ട്രിയും ആശങ്കയിലാണ്. രോഗം മൂലമുള്ള ജീവനക്കാരുടെ കുറവു നികത്തുന്നതു പലപ്പോഴും ഏജന്സികളില് ജോലിചെയ്യുന്ന ജീവനക്കാരെ ഉപയോഗിച്ചാണ്. എന്നാല്, നഴ്സിംഗ് ഹോമുകളില് മാറിമാറി ഏജന്സി ജീവനക്കാര് ജോലിക്ക് എത്തുന്നതു നഴ്സിംഗ് ഹോമുകള്ക്കും ഭീഷണിയായിട്ടുണ്ട്. രോഗബാധയുള്ള ഒരു നഴ്സിംഗ് ഹോമില് ജോലി ചെയ്ത ശേഷം രോഗബാധ ഇല്ലാത്തിടത്തേക്കും ഇവര് ജോലിക്ക് എത്തുന്നതു രോഗവ്യാപനത്തിനു കാരണമാകുമെന്നു ചൂണ്ടിക്കാണിക്കപ്പെടുന്നു. ഈ പ്രതിസന്ധി എങ്ങനെ മറികടക്കുമെന്ന ആലോചനയിലാണ് രാജ്യത്തെ കെയര് പ്രൊവൈഡര്മാര്. നാഷണല് ഹെല്ത്ത് സര്വീസില് ജോലി ചെയ്യുന്ന ജീവനക്കാര്ക്കായുള്ള കോവിഡ് പരിശോധന ദ്രുതഗതിയില് മുന്നോട്ടുപോകുന്നുണ്ട്. കൂടുതല് വെന്റിലേറ്ററുകള് ലഭ്യമാക്കാന് നിര്മാണ കമ്പനികളോടു സര്ക്കാര് ആവശ്യപ്പെട്ടിട്ടുണ്ട്.
