ഡോ.പി.സി.അലക്‌സാണ്ടര്‍ അന്തരിച്ചു

ചെന്നൈ: ഡോ.പി.സി.അലക്‌സാണ്ടര്‍ (90) അന്തരിച്ചു.  മഹാരാഷ്ട്രാ, തമിഴ്‌നാട് സംസ്ഥാനങ്ങളിലെ ഗവര്‍ണറായിരുന്നു. ഗോവ ഗവര്‍ണറുടെ ചുമതലയും വഹിച്ചിട്ടുണ്ട്. ചെന്നൈയിലെ മദ്രാസ് മെഡിക്കല്‍ മിഷന്‍ ആസ്പത്രിയില്‍ ബുധനാഴ്ച രാവിലെ 8.30നായിരുന്നു അന്ത്യം. അര്‍ബുദ രോഗബാധിതനായിരുന്ന അദ്ദേഹത്തെ ഞായറാഴ്ചയാണ് മെഡിക്കല്‍ മിഷന്‍ ആസ്പത്രിയില്‍ പ്രവേശിപ്പിച്ചത്. ഐ.എ.എസ് ഉദ്യോഗസ്ഥനായിരുന്നു.
പ്രധാനമന്ത്രിമാരായ ഇന്ദിരാഗാന്ധിയുടെയും രാജീവ് ഗാന്ധിയുടെയും പ്രിന്‍സിപ്പല്‍ സെക്രട്ടറിയായി പ്രവര്‍ത്തിച്ചിട്ടുണ്ട്. രാജ്യസഭാംഗവും ആയിരുന്നു. ബ്രിട്ടനിലെ ഇന്ത്യന്‍ ഹൈക്കമ്മീഷണര്‍ ആയും പ്രവര്‍ത്തിച്ചിട്ടുണ്ട്. വാണിജ്യ മന്ത്രാലയ സെക്രട്ടറിയായി നാലുവര്‍ഷവും ലണ്ടനിലെ ഇന്ത്യന്‍ ഹൈക്കമ്മീഷണറായി മൂന്നു വര്‍ഷവും സേവനം അനുഷ്ഠിച്ചിട്ടുണ്ട്. 1988 മുതല്‍ 90 വരെയാണ് തമിഴ്‌നാട് ഗവര്‍ണറായി പ്രവര്‍ത്തിച്ചത്. 1993 മുതല്‍ 2002 വരെ മാഹാരാഷ്ട്ര ഗവര്‍ണറായിരുന്നു. 1996 മുതല്‍ 98 വരെയാണ് ഗോവ ഗവര്‍ണറുടെ ചുമതല വഹിച്ചത്. ‘ത്രൂ ദി കോറിഡോര്‍സ് ഓഫ് പവര്‍’ എന്ന ആത്മകഥ ശ്രദ്ധ നേടിയിരുന്നു. ‘മൈ ഇയേഴ്‌സ് വിത്ത് ഇന്ദിരാഗാന്ധി’, ‘ദി പെറില്‍സ് ഓഫ് ഡെമോക്രസി’, ‘ഇന്ത്യ ഇന്‍ ദി ന്യൂ മില്ലെനിയം’ എന്നിവ ശ്രദ്ധേയമായ പുസ്തകങ്ങളാണ്.
1921 മാര്‍ച്ച് 21 ന് മാവേലിക്കരയിലാണ് ജനിച്ചത്. ചരിത്രത്തിലും സാമ്പത്തികശാസ്ത്രത്തിലും ബിരുദാനന്തര ബിരുദമുള്ള അദ്ദേഹം അണ്ണാമലൈ സര്‍വകലാശാലയില്‍ നിന്ന് ഡി ലിറ്റ്, എം ലിറ്റ് ബിരുദങ്ങള്‍ കരസ്ഥമാക്കി. 1948 ലാണ് ഐ.എ.എസ് ലഭിച്ചത്.