ബെയ്ജിംഗ്: പക്ഷിപ്പനിയുടെ എച്ച്3എന്8 വകഭേദം മനുഷ്യനില് കണ്ടെത്തിയതായി ചൈന സ്ഥിരീകരിച്ചു. വടക്കേ അമേരിക്കന് ജലപക്ഷികളില് ആദ്യമായി കണ്ടതിനു ശേഷം 2002 മുതല് എച്ച്3എന്8 ലോകത്തിന്റെ പല ഭാഗത്തായി കാണപ്പെടുന്നുണ്ട്. പക്ഷികളെ കൂടാതെ നായ്ക്കളെയും കുതിരകളെയുമൊക്കെ ഇതു ബാധിക്കുന്നതായി കണ്ടെത്തിയിട്ടുണ്ട്. എന്നാല്, ഈ വകഭേദം മനുഷ്യരില് ആദ്യമായിട്ടാണ് സ്ഥിരീകരിക്കുന്നതെന്നു ചൈനീസ് അധികൃതര് പറഞ്ഞു.
മധ്യ ഹെനാന് പ്രവിശ്യയില് താമസിക്കുന്ന നാലു വയസുകാരന് പനിയും മറ്റ് ലക്ഷണങ്ങളുമായി ഈ മാസം ആദ്യം ആശുപത്രിയില് പ്രവേശിപ്പിച്ചു. ഇവിടെ ചികിത്സയ്ക്കിടയിലാണ് എച്ച്3എന്8 സ്ഥിരീകരിച്ചത്. കുട്ടിയുടെ കുടുംബം വീട്ടില് കോഴികളെ വളര്ത്തുന്നുണ്ട്. അതുപോലെ കാട്ടു താറാവുകള് തിങ്ങിപ്പാര്ക്കുന്ന പ്രദേശത്താണ് താമസിക്കുന്നതെന്നും എന്എച്ച്സി പ്രസ്താവനയില് പറഞ്ഞു.
ആണ്കുട്ടിക്കു പക്ഷികളില്നിന്നു നേരിട്ട് രോഗബാധയുണ്ടായെന്നാണ് കരുതുന്നത്. എങ്കിലും മനുഷ്യരില് വ്യാപകമായി ബാധിക്കാനുള്ള സാധ്യത കാണുന്നില്ലെന്നും അധികൃതര് പറഞ്ഞു. കുട്ടിയുമായി സന്പര്ക്കം പുലര്ത്തിയവര്ക്കും ഇതുവരെ രോഗലക്ഷണങ്ങളില്ല. ചത്തതോ അസുഖമുള്ളതോ ആയ പക്ഷികളില്നിന്ന് അകന്നു നില്ക്കാനും പനിക്കും ശ്വാസകോശ സംബന്ധമായ ലക്ഷണങ്ങള്ക്കും ഉടന് ചികിത്സ തേടാനും പൊതുജനങ്ങള്ക്ക് മുന്നറിയിപ്പ് നല്കിയിട്ടുണ്ട്.
ഏവിയന് ഇന്ഫ്ലുവന്സ എന്നറിയപ്പെടുന്ന പക്ഷിപ്പനി പ്രധാനമായും കാട്ടുപക്ഷികളിലും കോഴികളിലുമാണ് കാണപ്പെടുന്നത്. മനുഷ്യര്ക്കിടയില് പകരുന്ന കേസുകള് വളരെ അപൂര്വമാണ്. ഇത്തരം രോഗങ്ങള്പ്രാഥമികമായി രോഗബാധിതരായ മൃഗങ്ങളുമായോ മലിനമായ ചുറ്റുപാടുകളുമായോ നേരിട്ടുള്ള സമ്പര്ക്കത്തിലൂടെയാണ് ഉണ്ടാകുന്നതെന്നാണ് ലോകാരോഗ്യ സംഘടന വ്യക്തമാക്കുന്നത്. പക്ഷേ, ഈ വൈറസുകള് മനുഷ്യര്ക്കിടയില് വ്യാപകമായി പടരാറില്ല.
Discussion about this post