ലണ്ടന്: കോവിഡിന്റെ ഒമിക്രോണ് വകഭേദത്തെ തടഞ്ഞു നിര്ത്താനുള്ള വഴികള് തേടിയില്ലെങ്കില് ബ്രിട്ടനില് ജനുവരിയില് വലിയ വ്യാപനത്തിന് സാധ്യതയെന്ന് വിദഗ്ധര് ചൂണ്ടിക്കാട്ടുന്നു. ലണ്ടന് സ്കൂള് ഓഫ് ഹൈജീന് ആന്ഡ് ട്രോപ്പിക്കല് മെഡിസിനിലെ ഗവേഷകരാണ് ഇത് സംബന്ധിച്ച് പഠനം നടത്തിയത്.
ബൂസ്റ്റര് ഡോസ് എടുക്കുന്നവരുടെ എണ്ണം വര്ധിച്ചാല് രോഗവ്യാപനത്തെ ഒരു പരിധിവരെ പിടിച്ചു നിര്ത്താന് സാധിക്കുമെന്നും പഠനത്തില് പറയുന്നു. ബൂസ്റ്റര് ഡോസുകള് കാര്യക്ഷമമല്ലാതായാല് 34.2 ദശലക്ഷം അണുബാധകളും 4.92 ലക്ഷം ആശുപത്രി പ്രവേശനങ്ങളും 74,900 മരണങ്ങള്ക്കും സാധ്യതയുണ്ടെന്നാണ് മുന്നറിയിപ്പ്.
രാജ്യത്ത് ഒമിക്രോണിന്റെ വ്യാപനം വരുന്നുണ്ടെന്ന് പ്രധാനമന്ത്രി ബോറിസ് ജോണ്സനും വ്യക്തമാക്കി. മാസാവസാനത്തോടെ ബൂസ്റ്റര് ഡോസുകള് ആവശ്യമുള്ള എല്ലാ മുതിര്ന്നവര്ക്കും നല്കുന്നതിനുള്ള പദ്ധതി സജ്ജീകരിച്ചിട്ടുണ്ടെന്നും പ്രധാനമന്ത്രി പറഞ്ഞു.
ഒമിക്രോണ് ഭീഷണിയെ തുടര്ന്ന് യുകെയുടെ കോവിഡ് അലര്ട്ട് ലെവല് നാലായി ഉയര്ത്തിയിട്ടുണ്ട്.
