ചെന്നൈ: നടനും സംവിധായകനുമായ പ്രതാപ് പോത്തന്(70) അന്തരിച്ചു. ചെന്നൈയിലെ ഫ്ളാറ്റില് മരിച്ച നിലയില് കണ്ടെത്തുകയായിരുന്നു. 1978ല് ഭരതന് കഥയും തിരക്കഥയും രചിച്ച് സംവിധാനം ചെയ്ത ആരവം എന്ന സിനിമയിലൂടെയാണ് പ്രതാപ് പോത്തന് അഭിനയരംഗത്തേക്ക് അരങ്ങേറ്റം കുറിച്ചത്. തകര, ചാമരം എന്നീ സിനിമകളിലൂടെ ശ്രദ്ധേയ നടനായി.
മമ്മൂട്ടി നായകനായി എത്തിയ സിനിമ സിബിഐ-5 ദ് ബ്രെയ്ന് ആണ് അവസാനം പുറത്തുവന്ന ചിത്രം. നടന് മോഹന്ലാലിന്റെ സംവിധാനത്തിലൊരുങ്ങുന്ന ബാറോസിലും അദ്ദേഹം മികച്ച വേഷം ചെയ്തിട്ടുണ്ട്.
മലയാളം, തമിഴ്, കന്നട, തെലുങ്ക്, ഹിന്ദി സിനിമകളില് അഭിനയിച്ചിട്ടുള്ള അദ്ദേഹം നിര്മാതാവ്, എഴുത്തുകാരന് എന്നീ മേഖലകളിലും കൈയൊപ്പ് പതിപ്പിച്ചിട്ടുണ്ട്. മീണ്ടും ഒരു കാതല് കഥൈയിലൂടെ മികച്ച നവാഗത സംവിധായകനുള്ള ദേശീയ പുരസ്കാരം ലഭിച്ചു.
ഋതുഭേദം, ഡെയ്സി, ഒരു യാത്രാമൊഴി എന്നീ മലയാളചിത്രങ്ങളും തെലുങ്കില് ചൈതന്യ എന്ന ചിത്രവും തമിഴില് ജീവ, വെട്രിവിഴ, ലക്കിമാന് തുടങ്ങിയ ചിത്രങ്ങളും അടക്കം ഏകദേശം മുപ്പതോളം ചിത്രങ്ങള് പ്രതാപ് പോത്തന് സംവിധാനം ചെയ്തു.
1985ല് നടി രാധികയെ വിവാഹം ചെയ്തുവെങ്കിലും ഈ ബന്ധം അധികകാലം നീണ്ടു നിന്നില്ല. പിന്നീട് തുടര്ന്ന് സീനിയര് കോര്പ്പറേറ്റ് പ്രൊഫഷണലായിരുന്ന അമല സത്യനാഥിനെ 1990ല് അദ്ദേഹം വിവാഹം കഴിച്ചു. ദമ്പതികള്ക്ക് കേയ എന്ന ഒരു മകളുണ്ട്. 22 വര്ഷത്തിന് ശേഷം ഈ വിവാഹവും 2012ല് അവസാനിച്ചു. തിരുവനന്തപുരം കുളത്തുങ്കല് കുടുംബാംഗമാണ്. നിര്മാതാവ് ഹരിപോത്തന് സഹോദരനാണ്.
Discussion about this post