ചെന്നൈ: ഗാന്ധി ജയന്തി ദിനത്തില് ആര്എസ്എസിന്റെ റൂട്ട് മാര്ച്ച് തടഞ്ഞ തമിഴ്നാട് സര്ക്കാര് നടപടി മദ്രാസ് ഹൈക്കോടതി ശരിവച്ചു. റൂട്ട് മാര്ച്ചിന് അനുമതി നിഷേധിച്ചതിനെതിരെ ആര്എസ്എസ് നല്കിയ കോടതിയലക്ഷ്യ ഹര്ജിയിലാണ് സര്ക്കാര് നിലപാട് ശരിവച്ചത്. വര്ഗീയ സംഘര്ഷ സാദ്ധ്യത ഉള്ളതിനാലാണ് റൂട്ട് മാര്ച്ചിന് അനുമതി നിഷേധിച്ചതെന്ന് സര്ക്കാര് കോടതിയെ അറിയിച്ചു. ഇത് കണക്കിലെടുത്ത കോടതി, ഒക്ടോബര് രണ്ടിന് പകരം നവംബര് ആറിന് റൂട്ട് മാര്ച്ച് നടത്താവുന്നതാണെന്ന് നിര്ദേശിക്കുകയും ചെയ്തു.
ഗാന്ധി ജയന്തി ദിനത്തില് ആര്എസ്എസ് പ്രഖ്യാപിച്ച റൂട്ട് മാര്ച്ചിന് ഇന്നലെയാണ് തമിഴ്നാട് സര്ക്കാര് അനുമതി നിഷേധിച്ചത്. റൂട്ട് മാര്ച്ച് നടത്താന് മദ്രാസ് ഹൈക്കോടതി സിംഗിള് ബെഞ്ച് നല്കിയ അനുമതി നിലനില്ക്കെയായിരുന്നു ഈ നടപടി. സുരക്ഷ ചൂണ്ടിക്കാണിച്ചാണ് സര്ക്കാര് റൂട്ട്മാര്ച്ച് വിലക്കിയത്. സര്ക്കാരിന്റെ ഈ തീരുമാനത്തിന് എതിരെയാണ് ആര്എസ്എസ് മദ്രാസ് ഹൈക്കോടതിയെ സമീപിച്ചത്. നേരത്തേ തിരുവള്ളൂര് ജില്ലയിലെ റൂട്ട് മാര്ച്ചിന് ജില്ലാ പൊലീസ് മേധാവി അനുമതി നിഷേധിച്ചിരുന്നു.
Discussion about this post