ശബരിമല: മണ്ഡല മകരവിളക്ക് തീര്‍ത്ഥാടനത്തിന്റെ വിജയത്തിനായി ദേവസ്വം ബോര്‍ഡിനൊപ്പം വിവിധ സര്‍ക്കാര്‍ വകുപ്പുകള്‍ ഒരുമയോടെ പ്രവര്‍ത്തിച്ചതായി ദേവസ്വം മന്ത്രി കടകംപള്ളി സുരേന്ദ്രന്‍ അറിയിച്ചു. കഴിഞ്ഞ ഏതു കാലത്തേക്കാളും ചിട്ടയോടെ തീര്‍ത്ഥാടനം സംഘടിപ്പിക്കാന്‍ സാധിച്ചത് സര്‍ക്കാരിന്റെയും ദേവസ്വം ബോര്‍ഡിന്റേയും മികച്ച ഏകോപനം മൂലമാണ്. മുഖ്യമന്ത്രിയുടെ നേതൃത്വത്തില്‍ ശബരിമല തീര്‍ത്ഥാടനവുമായി ബന്ധപ്പെട്ട് മൂന്ന് അവലോകന യോഗങ്ങളാണ് നടന്നത്. ദേവസ്വം മന്ത്രിയെന്ന നിലയില്‍ അഞ്ച് യോഗങ്ങള്‍ വേറേയും സംഘടിപ്പിക്കുകയുണ്ടായി. പിഴവുകളില്ലാതെ ശബരിമല മണ്ഡല മകരവിളക്ക് ഉത്സവം നടത്തണമെന്ന ഉദ്ദേശത്തോടെയാണ് പ്രവര്‍ത്തനം നടത്തിയത്.
ജില്ലാ ഭരണകൂടവും വിവിധ ഭക്തസംഘടനകളും ദേവസ്വം ബോര്‍ഡും മറ്റു വകുപ്പുകളും അയ്യപ്പന്റെ പൂങ്കാവനത്തെ വൃത്തിയായി സൂക്ഷിക്കാന്‍ മുന്നോട്ടു വന്നു. പുണ്യം പൂങ്കാവനം പദ്ധതി വിജയകരമായി നടപ്പാക്കി. ശബരിമലയെ പ്ലാസ്റ്റിക് മുക്തമാക്കണമെന്ന കേരള ഹൈക്കോടതിയുടെ നിര്‍ദ്ദേശം പാലിക്കുന്നതിന് ശക്തമായ പ്രവര്‍ത്തനമാണ് സര്‍ക്കാരും ദേവസ്വം ബോര്‍ഡും നടത്തിയത്. ഇതിന് പത്തനംതിട്ട ജില്ലാ കളക്ടര്‍ ചുക്കാന്‍ പിടിച്ചു. ശബരിമലയിലെ പ്ലാസ്റ്റിക് മുക്ത പ്രവര്‍ത്തനം വലിയൊരു സന്ദേശമാണ് നല്‍കുന്നത്. ലക്ഷക്കണക്കിന് ഭക്തരെത്തുന്ന ശബരിമലയെ പ്ലാസ്റ്റിക് മുക്തമാക്കാമെങ്കില്‍ കേരളത്തിലെവിടെയും ഈ പദ്ധതി നടപ്പാക്കാനാവുമെന്ന് ബോധ്യമായി.
പ്ലാസ്റ്റിക് ഒഴിവാക്കാനുള്ള നിര്‍ദ്ദേശമുണ്ടായപ്പോള്‍ ഏറ്റവും വലിയ ആശങ്ക കുടിവെള്ളം നല്‍കുന്നത് സംബന്ധിച്ചായിരുന്നു. പ്ലാസ്റ്റിക് കുപ്പികളെ പടിക്കുപുറത്ത് നിറുത്തുമ്പോള്‍ ലക്ഷക്കണക്കിന് തീര്‍ത്ഥാടകര്‍ക്ക് കുടിവെള്ളം നല്‍കാന്‍ ബദല്‍ മാര്‍ഗം ആവിഷ്‌കരിക്കേണ്ടി വന്നു. വാട്ടര്‍ അതോറിറ്റിയും ദേവസ്വം ബോര്‍ഡും അയ്യപ്പസേവാസംഘം പോലെയുള്ള സംഘടനകളും ഇക്കാര്യത്തില്‍ മികവുറ്റ പ്രവര്‍ത്തനമാണ് കാഴ്ചവച്ചത്. ശുദ്ധമായ കുടിവെള്ളം ആവശ്യാനുസരണം നല്‍കുന്നതിന് വാട്ടര്‍ കിയോസ്‌കുകള്‍ ശബരിമലയില്‍ വിവിധ സ്ഥലങ്ങളില്‍ സ്ഥാപിച്ചു. കൂടാതെ ഭക്ത സംഘടനകളുടെ നേതൃത്വത്തില്‍ ചുക്കുവെള്ളവും നല്‍കി. കുടിവെള്ള വിതരണം കുറ്റമറ്റ രീതിയില്‍ നടപ്പാക്കുന്നതില്‍ എല്ലാവരും സഹകരിച്ചു. മകരവിളക്കിന് സന്നിധാനത്തേക്കെത്തിയ ലക്ഷക്കണക്കിന് ഭക്തര്‍ക്ക് കുടിവെള്ളം നല്‍കാന്‍ സാധിച്ചത് ഇതിന്റെ വിജയമാണ് സൂചിപ്പിക്കുന്നത്.
പോലീസിന്റെ പ്രവര്‍ത്തനം ശ്ളാഘനീയമാണ്. ശബരിമലയിലേക്ക് തീര്‍ത്ഥാടകര്‍ ഒഴുകിയെത്തിയെങ്കിലും ശക്തമായ സുരക്ഷാ ക്രമീകരണങ്ങള്‍ ഒരുക്കുന്നതിനൊപ്പം അവരെ ഫലപ്രദമായി നിയന്ത്രിക്കുന്നതിനും പോലീസിന് സാധിച്ചു. മറ്റു സുരക്ഷാ സേനകളുടെയും പ്രവര്‍ത്തനം അഭിനന്ദനീയമാണ്.
ആരോഗ്യവകുപ്പിന്റെ പ്രവര്‍ത്തനങ്ങള്‍ എടുത്തു പറയേണ്ടതുണ്ട്. എമര്‍ജന്‍സി മെഡിക്കല്‍ സെന്ററുകളും മറ്റു സജ്ജീകരണങ്ങളുമായി തീര്‍ത്ഥാടകര്‍ക്ക് ആവശ്യമായ ചികിത്സാ സംവിധാനം ഒരുക്കി. ഹൃദയസംബന്ധമായ അസുഖങ്ങള്‍ മൂലമുള്ള മരണം ശബരിമലയില്‍ കുറയ്ക്കാന്‍ കഴിഞ്ഞത് ആരോഗ്യവകുപ്പിന്റെ നേട്ടമാണ്. അലോപ്പോതിക്കൊപ്പം ഹോമിയോ, ആയുര്‍വേദ വകുപ്പുകളും നല്ല രീതിയില്‍ പ്രവര്‍ത്തിച്ചു. ഫയര്‍ഫോഴ്സ്, വനം, എക്സൈസ്, കെ. എസ്. ഇ. ബി, ഇറിഗേഷന്‍, റവന്യു തുടങ്ങി ശബരിമലയുമായി ബന്ധപ്പെട്ട എല്ലാ വകുപ്പുകളും തീര്‍ത്ഥാടനം വിജയിപ്പിക്കുന്നതിന് ആത്മാര്‍ത്ഥമായി സഹകരിച്ചു. സന്നിധാനത്ത് പ്രവര്‍ത്തിച്ച ശുചിത്വസേനയുടെ കാര്യവും ഈ അവസരത്തില്‍ ഓര്‍ക്കേണ്ടതുണ്ട്. കരാര്‍ അടിസ്ഥാനത്തിലും ദിവസവേതനത്തിലും പ്രവര്‍ത്തിക്കുന്ന തൊഴിലാളികളും തീര്‍ത്ഥാടനം വിജയിപ്പിക്കുന്നതില്‍ മുഖ്യപങ്കു വഹിച്ചിട്ടുണ്ട്. എല്ലാവര്‍ക്കും ഈ അവസരത്തില്‍ അഭിനന്ദനം അറിയിക്കുന്നു.
ശബരിമല തീര്‍ത്ഥാടനം: ഏകോപനം വന്‍ വിജയം
പുതിയ വാർത്തകൾ
Discussion about this post