തിരുവനന്തപുരം: ആറ്റുകാല് ഭഗവതി ക്ഷേത്രത്തിലെ പ്രധാന നേര്ച്ചകളിലൊന്നായ കുത്തിയോട്ടത്തിനുള്ള വ്രതം ഇന്ന് ആരംഭിക്കും. വ്രതം നോക്കുന്ന കുട്ടി പൊങ്കാല ദിവസം ദേവിയുടെ പുറത്തേക്കുള്ള എഴുന്നള്ളില് കുത്തിയോട്ടത്തില് പങ്കെടുക്കും. കോവിഡിനു മുന്പ് കുത്തിയോട്ട വ്രതത്തില് ആയിരത്തോളം ബാലന്മാര് പങ്കെടുത്തിരുന്നു. കോവിഡ് കാരണം കഴിഞ്ഞ വര്ഷവും ഒരു ബാലന് മാത്രമാണ് വ്രതമെടുത്തത്.
ഉത്സവത്തിന്റെ രണ്ടാം ദിവസമായ ഇന്നലെ ആറ്റുകാലിലേക്ക് ഭക്തപ്രവാഹമായിരുന്നു. നാരങ്ങാവിളക്കു തെളിച്ചും മറ്റ് വഴിപാടുകള് നടത്തിയും അംബാ ഓഡിറ്റോറിയത്തിലെ നേര്ച്ചയൂണില് പങ്കു ചേര്ന്നും ഭക്തജനങ്ങള് ആറ്റുകാലമ്മയെ തൊഴുതു മടങ്ങി.
ക്ഷേത്രത്തിനു മുന്നിലെ പച്ചപ്പന്തലില് ദേവിയുടെ വിവാഹത്തിന്റെ ഒരുക്കങ്ങളെക്കുറിച്ചാണ് തോറ്റം പാട്ടില് ഉള്പ്പെടുത്തിയത്. കോവലനും കണ്ണകിയുമായുള്ള വിവാഹ വര്ണന ഇന്നത്തെ ഭാഗം.
ബുധനാഴ്ച രാത്രി മുതല് നഗരത്തിലെ വിവിധ ഭാഗങ്ങളില് നിന്ന് വിളക്കുകെട്ട് എഴുന്നെള്ളിപ്പ് ആരംഭിച്ചിരുന്നു. വരുംദിവസങ്ങളില് ഇവയുടെ എണ്ണം കൂടും. മൂന്നു വേദികളിലായി ക്ഷേത്രകലകള് രാവിലെ മുതല് അവതരിപ്പിക്കുന്നു.
Discussion about this post