ദേശീയം

ഗോമാതായുടെ സംരക്ഷണത്തില്‍നിന്ന് കേന്ദ്രസര്‍ക്കാര്‍ പിന്നോട്ടില്ലെന്ന് ധനമന്ത്രി പീയൂഷ് ഗോയല്‍ പറഞ്ഞു. പശുസംരക്ഷണത്തിന് കേന്ദ്രസര്‍ക്കാര്‍ രാഷ്ട്രീയ കാമധേനു ആയോഗ് രൂപവത്കരിക്കുമെന്നും അദ്ദേഹം പറഞ്ഞു.

സ്റ്റുഡന്റ്‌സ് ഇസ്‌ലാമിക് മൂവ്‌മെന്റ് ഓഫ് ഇന്ത്യ(സിമി) യുടെ നിരോധനം അഞ്ചുവര്‍ഷത്തേക്കുകൂടി കേന്ദ്രസര്‍ക്കാര്‍ നീട്ടി. വിധ്വംസകപ്രവര്‍ത്തനങ്ങളുമായി സംഘടന മുന്നോട്ടുപോകുന്ന സാഹചര്യത്തിലാണ് നീരോധനം നീട്ടിയത്.

മുന്‍ ബീഹാര്‍ മുഖ്യമന്ത്രി റാബറി ദേവിയുടെയും മകള്‍ ഹേമ യാദവിന്റെയും പേരിലുള്ള സ്വത്തുകള്‍ ആദായ നികുതി വകുപ്പ് കണ്ടുകെട്ടി. സ്വത്തുകള്‍ നിയമവിരുദ്ധമായാണ് നേടിയതെന്ന് തെളിഞ്ഞതിനെ തുടര്‍ന്നാണു നടപടി.

രാജസ്ഥാനിലെ രാംഗഡ് മണ്ഡലത്തിലേക്ക് ഉപതിരഞ്ഞെടുപ്പില്‍ ഭരണ കക്ഷിയായ കോണ്‍ഗ്രസിലെ ഷഫിയ സുബൈര്‍ ഖാന്‍ 12,228 വോട്ടുകളുടെ ഭൂരിപക്ഷത്തിലാണ് എതിര്‍സ്ഥാനാര്‍ത്ഥിയായ സുഖ് വന്ത് സിങ്ങിനെ പരാജയപ്പെടുത്തിയത്.

മുന്‍ കേന്ദ്രമന്ത്രി ജോര്‍ജ്ജ് ഫെര്‍ണാണ്ടസ്(88) അന്തരിച്ചു. ഡല്‍ഹിയിലായിരുന്നു അന്ത്യം. അല്‍ഷിമേഴ്‌സ് രോഗത്തിന് ചികിത്സയിലായിരുന്നു. 1930 ജൂണ്‍ മൂന്നിന് മംഗലാപുരത്തായിരുന്നു ജനിച്ചത്.

നേതാജി സുഭാഷ് ചന്ദ്ര ബോസ് മ്യൂസിയം പ്രധാനമന്ത്രി നരേന്ദ്രമോദി രാഷ്ട്രത്തിന് സമര്‍പ്പിച്ചു. റെഡ് ഫോര്‍ട്ടില്‍ നേതാജിയുടെ 122-ാം ജന്മവാര്‍ഷിക ദിനത്തോടനുബന്ധിച്ചാണ് സമര്‍പ്പണം നടന്നത്.

കേരളത്തിലെ ദേവസ്വം ബോര്‍ഡുകളിലെ സര്‍ക്കാര്‍ നിയന്ത്രണത്തിനെതിരെ നല്‍കിയ ഹര്‍ജികള്‍ പരിഗണിക്കുന്നത് സുപ്രീംകോടതി ഈ മാസം 31ലേക്ക് മാറ്റി.

തിരഞ്ഞെടുപ്പ് പ്രചാരണങ്ങള്‍ക്ക് തുടക്കമിട്ട് പശ്ചിമ ബംഗാളില്‍ ബിജെപി ദേശീയ അധ്യക്ഷന്‍ അമിത് ഷാ നയിക്കുന്ന തിരഞ്ഞെടുപ്പ് റാലികള്‍ക്ക് ഇന്ന് തുടക്കമാകും.

സിദ്ധഗംഗ മഠത്തിന്റെ പരമാചാര്യന്‍ ശിവകുമാര സ്വാമിജി സമാധിയായി.111 വയസ്സായിരുന്നു. വാര്‍ദ്ധക്യസംബന്ധമായി അദ്ദേഹം ചികിത്സയിലായിരുന്നു.

2015 മുതല്‍ 2018 വരെയുള്ള ഗാന്ധിയന്‍ സമാധാന പുരസ്‌കാര ജേതാക്കളെ കേന്ദ്രസര്‍ക്കാര്‍ പ്രഖ്യാപിച്ചു. 2015ലെ ഗാന്ധിയന്‍ സമാധാന പുരസ്‌കാരം കന്യാകുമാരി വിവേകാനന്ദ കേന്ദ്രത്തിനാണ് ലഭിച്ചിരിക്കുന്നത്.