ദേശീയം

അതിശക്തമായ മഴയെ തുടര്‍ന്ന് മുംബൈയില്‍ ജനജീവിതം താറുമാറായി. ഇന്നലെ വൈകിട്ട് ആരംഭിച്ച മഴ ശക്തമായി തുടരുകയാണ്. കനത്തമഴയില്‍ ഇതുവരെ മൂന്നു പേര്‍ മരിച്ചതായാണ് റിപ്പോര്‍ട്ടുകള്‍ സൂചിപ്പിക്കുന്നത്.

കരസേന മേജറുടെ ഭാര്യ കൊല്ലപ്പെട്ട സംഭവത്തില്‍ മറ്റൊരു മേജര്‍ അറസ്റ്റില്‍. മേജര്‍ നിഖില്‍ ഹണ്ടയാണ് അറസ്റ്റിലായത്. ഇയാളെ ഉത്തര്‍പ്രദേശിലെ മീററ്റില്‍നിന്നാണ് പോലീസ് അറസ്റ്റ് ചെയ്തത്.

ഇന്ത്യയിലെ മെട്രോ മാനദണ്ഡങ്ങള്‍ പരിഷ്‌കരിക്കുന്നതിന് പുതിയ ഉന്നതാധികാര സമിതി. ഇ ശ്രീധരന്‍ അധ്യക്ഷനായ സമിതിക്കാണ് പ്രധാനമന്ത്രി അംഗീകാരം നല്‍കിയിരിക്കുന്നത്.

മുംബൈയില്‍ ഇന്‍ഡിഗോ വിമാനത്തിന് ബോംബ് ഭീഷണി. ജയ്പൂര്‍-മുംബൈ വിമാനത്തിനാണ് ഇന്ന് പുലര്‍ച്ചെ 5.30ന് ഭീഷണി കോള്‍ എത്തിയത്.

ഉരുള്‍പൊട്ടലില്‍ കേരള - കര്‍ണാടക അതിര്‍ത്തിയില്‍ അന്തര്‍സംസ്ഥാന പാത ഒലിച്ചുപോയി. ഇതുവഴിയുള്ള ഗതാഗതം പൂര്‍ണമായും തടസപ്പെട്ടു. മാക്കൂട്ടം എന്ന സ്ഥലത്താണ് റോഡ് പൂര്‍ണമായും ഒലിച്ചുപോയത്.

സെന്‍ട്രല്‍ വിജിലന്‍സ് കമ്മീഷനില്‍ വിജിലന്‍സ് കമ്മീഷണറായി ശരദ് കുമാറിനെ നിയമിച്ചു. ദേശീയ അന്വേഷണ ഏജന്‍സിയുടെ മുന്‍ അധ്യക്ഷനാണ് 1979 ഹരിയാന കേഡര്‍ ഐപിഎസ് ഓഫീസറായ ശരദ്കുമാര്‍.

ജമ്മു കശ്മീരില്‍ ഭീകരാക്രമണത്തില്‍ രണ്ടു പൊലീസുകാര്‍ കൊല്ലപ്പെട്ടു. 10 പൊലീസുകാര്‍ക്കു പരുക്കേറ്റു. ഗുലാം റസൂല്‍, ഗുലാം ഹസന്‍ എന്നീ പൊലീസുകാരാണു കൊല്ലപ്പെട്ടത്.

മഹാത്മ ഗാന്ധി വധവുമായി ബന്ധപ്പെട്ട പരാമര്‍ശത്തില്‍ കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിക്കെതിരെ കുറ്റം ചുമത്തി. മുംബൈയിലെ ഭിവണ്ടി കോടതിയാണ് രാഹുലിനെതിരെ കുറ്റം ചുമത്തിയത്.

ഡല്‍ഹി ഓള്‍ ഇന്ത്യ മെഡിക്കല്‍ സയന്‍സസില്‍ പ്രവേശിപ്പിച്ച മുന്‍ പ്രധാനമന്ത്രി എ ബി വാജ്‌പേയിയുടെ ആരോഗ്യനില തൃപ്തികരമെന്ന് ആശുപത്രി അധികൃതര്‍ അറിയിച്ചു.

തമിഴ്നാട് സര്‍ക്കാര്‍, സ്വാശ്രയ മെഡിക്കല്‍ കോളേജുകളില്‍ എം.ബി.ബി.എസ്, ബി.ഡി.എസ്. പ്രവേശനത്തിനുള്ള അപേക്ഷാ ഫോറം വിതരണം തിങ്കളാഴ്ച തുടങ്ങി. പൂരിപ്പിച്ച അപേക്ഷകള്‍ 19-ന് മുന്‍പ് സമര്‍പ്പിക്കണം.