ദേശീയം

ആത്മീയഗുരു ബാബ ജയ്ഗുരുദേവിന്റെ അനുസ്മരണവുമായി ബന്ധപ്പെട്ട് സംഘടിപ്പിച്ച പരിപാടിയില്‍ തിക്കിലും തിരക്കിലും പെട്ട് 19 പേര്‍ മരിച്ചു. സംഭവത്തില്‍ പ്രധാനമന്ത്രി ദുഃഖം രേഖപ്പെടുത്തി.

കണ്ണൂരില്‍ ബിജെപി പ്രവര്‍ത്തകനായ രമിത്തിന്റെ കൊലപാതകം സിബിഐ അന്വേഷിക്കണമെന്ന് ബിജെപി കേന്ദ്രനേതൃത്വം ആവശ്യപ്പെട്ടു.

ചികിത്സയില്‍ കഴിയുന്ന തമിഴ്‌നാട് മുഖ്യമന്ത്രി ജയലളിത വഹിച്ചിരുന്ന ആഭ്യന്തരം, പൊതുഭരണം ഉള്‍പ്പെടെയുള്ള വകുപ്പുകള്‍ ധനമന്ത്രി ഒ. പനീര്‍ശെല്‍വത്തിനു കൈമാറി. ജയലളിത മുഖ്യമന്ത്രിയായി തുടരും.

പാംപോറിലെ സര്‍ക്കാര്‍ കെട്ടിടത്തില്‍ അതിക്രമിച്ചു കടന്ന രണ്ട് ഭീകരരെ വധിച്ചു. ഇതേത്തുടര്‍ന്ന് ഭീകരരെ കീഴടക്കുന്നതിനായുള്ള സൈനിക നടപടി അവസാനിച്ചു.

ആളിയാര്‍ കരാറുമായി ബന്ധപ്പെട്ട് പൊള്ളാച്ചിയില്‍ നടന്ന ഉദ്യോഗസ്ഥതല ചര്‍ച്ചയില്‍ കേരളത്തിന് സെക്കന്‍ഡില്‍ 300 ഘനയടി വെള്ളം വിട്ടുനല്‍കാന്‍ തീരുമാനമായി.

സൗമ്യ വധക്കേസില്‍ തെളിവുകളും സാക്ഷിമൊഴികളും നിരത്തിയ പ്രോസിക്യൂഷനു ഗുരുതരമായ വീഴ്ചയുണ്ടായെന്നു സുപ്രീംകോടതി. വാദം തുടരുന്നതിനു കേസ് 17ലേക്കു മാറ്റി.

തമിഴ്‌നാട് മുഖ്യമന്ത്രി ജയലളിതയുടെ ആരോഗ്യസ്ഥിതി സംബന്ധിച്ച വിവരങ്ങള്‍ പുറത്തുവിടണമെന്നാവശ്യപ്പെട്ട് സമര്‍പ്പിച്ച പൊതുതാത്പര്യ ഹര്‍ജി മദ്രാസ് ഹൈക്കോടതി തള്ളി.

കച്ചിനു സമീപത്തെ കടലിടുക്കില്‍ നിന്ന് ബി.എസ്.എഫ് പട്രോളിങ്ങിനിടെ പാക് ബോട്ട് കണ്ടെത്തി. ബോട്ടില്‍ ഒമ്പത് പാകിസ്താനികളുണ്ടായിരുന്നതായി സ്ഥിരീകരിക്കാത്ത റിപ്പോര്‍ട്ടുകളുണ്ട്.

തമിഴ്‌നാട്ടിലെ തദ്ദേശസ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പ് വിജ്ഞാപനം മദ്രാസ് ഹൈക്കോടതി റദ്ദാക്കി. ധൃതി പിടിച്ചാണ് വിജ്ഞാപനം പുറപ്പെടുവിച്ചതെന്നു ചൂണ്ടികാട്ടി ഡിഎംകെ നല്‍കിയ പരാതിയിലാണ് ഉത്തരവ്.

ഇന്ധനവിലയില്‍ നേരിയ വര്‍ധന. പെട്രോള്‍ വില ലിററ്റിന് 14 പൈസയും ഡീസല്‍ വില 10 പൈസയുമാണ് വര്‍ധിപ്പിച്ചത്. ഇതോടെ ഡല്‍ഹിയില്‍ പെട്രോള്‍ ലിറ്ററിന് 64.72 രൂപയായി.